निजी विद्यालयको परीक्षा शुल्क नगरपालिकाले व्यहोर्ने
![निजी विद्यालयको परीक्षा शुल्क नगरपालिकाले व्यहोर्ने](https://annapurnapost.prixacdn.net/media/albums/school-5aab89a3213168.30445646_Ram4C4APcW.jpg)
परासी : रामग्राम नगरपालिकाले निजी विद्यालयमा अध्ययनरत कक्षा आठका विद्यार्थीबाट लिँदै आएको शुल्क आफैंले व्यहोर्ने भएको छ । स्थानीय सरकार सञ्चालन ऐन २०७४ मा शिक्षा सम्बन्धी २३ वटा अधिकार स्थानीय तहलाई दिएको छ ।
सोही बमोजिम शिक्षाको अधिकारमा सबै विद्यार्थीको समान पहुँच पुयाउने उद्देश्यले निजी विद्यालयको परीक्षा व्यवस्थापन र सञ्चालन खर्च समेत नगरपालिका आफैंले व्यहोर्ने निर्णय गरिएको रामग्राम नगरपालिकाका प्रमुख प्रशासकिय अधिकृत दिनेशराज पन्तले बताए ।
सरकारले निःशुल्क शिक्षाको व्यवस्था गरेपनि यहाँका केही सामुदायिक विद्यालयले विगत वर्षमा परीक्षा वापत विद्यार्थीबाट शुल्क उठाउँदै आएका थिए । नगरपालिकाले यसवर्षदेखि नगर क्षेत्रका कुनै पनि विद्यालयलाई कक्षा आठको परीक्षा वापतको शुल्क नलिन निर्देशन गरिएको प्रमुख प्रशासकिय अधिकृत पन्तको भनाइ छ ।
नगरपालिकाको निर्देशन अघि केही सामुदायिक विद्यालयहरुले परीक्षा वापत एक सय ५० र निजी विद्यालयले पाँच सय रुपैयाँ प्रति विद्यार्थी परीक्षा शुल्क उठाएका छन् । परीक्षा वापतको शुल्क लिएको भन्ने जानकारी आएकाले सबै विद्यालयलाई शुल्क फिर्ता गर्न निर्देशन गरिएको पन्तले बताए ।
शुल्क उठाएका निजी विद्यालयले मासिक शुल्कमा मिलान गर्ने गरी व्यवस्था मिलाउन नगरपालिकाले पत्रचार गरेको हो । परीक्षा सञ्चालन र व्यवस्थापन गर्दा प्रति विद्यार्थी कम्तीमा एक सय ५० रुपैयाँ लाग्ने पन्तले जानकारी दिए ।
नगर क्षेत्रमा २९ विद्यालय छन् । रामग्राम नगरपालिकाका शिक्षा शाखा अधिकृत दिनेश गौंडका अनुसार १४ सामुदायिक र १५ निजी विद्यालयबाट एक हजार चार सय एक विद्यार्थी कक्षा आठको परीक्षामा सहभागी हुँदै छन् ।
१२ वटा केन्द्र निर्धारण गरेर लिइने कक्षा आठको परीक्षामा ६ सय ५७ निजी र सात सय ४४ सामुदायिक विद्यालयका विद्यार्थीहरु सहभागी हुने छन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)