दलितलाई मन्दिर प्रवेशमा रोक

वीरगन्ज : बाराको सिमरौनगढ नगरपालिका –७ झवानी टोलमा रहेको दलित समुदाय नजिकै रहेको शिव मन्दिरमा पूजापाठ गर्नबाट बन्चित भएको छ । झवानी टोलका चमार जातिलाई गैह्र दलितले मन्दिर प्रवेशमा रोक लगाए पछि पुजापाठ गर्नबाट उनीहरु बन्चित भएका हुन् ।

झवानी टोलमा करिब चार दशक पहिले निर्माण गरिएको मन्दिरमा त्यहाँका गैह्र दलितले अहिले सम्म पनि दलितलाई प्रवेश गर्न नदिएको स्थानीय विनोद महरा चमारले बताए ।

करिब एक सय ५० घर धुरी रहेको उक्त टोलमा चमार जातिका १०–१२ घरधुरी छन् । बाँकी ब्राह्मण, राजपुत, सहनी, तेली र नुनिया जातिको बसोबास छ ।

‘मन्दिर बनाउने बेलामा हाम्रै काका बुबाहरुले ज्यामी र मजदुर बनेर सघाए ।’ चमारले भने , ‘जब मन्दिर बन्यो हामीलाइ तल्लो जाति भनेर मन्दिरमा छिर्न पनि दिइएन । दलितले मन्दिर भित्र पूजा गरे अपवित्र हुने भन्दै पूजापाठ गर्न नदिएको समेत उनको भनाइ छ ।
द
लित वस्तीकै छेउमा रहेको मन्दिरमा पूजापाठ गर्न नपाउँदा उनीहरु गाउँ भन्दा टाढा रहेको सिम्रौनगढ बजार र अमृतगन्जको रानीवास बजारमा रहेको मन्दिरमा गएर पूजापाठ गर्न बाध्य छन् ।

साविक सिम्रौनगढ गाविसका पूर्व अध्यक्ष गगनदेव कुशवाहाले गाँउका दलितहरु आफनो अधिकार प्रति जागरुक नभएकै कारण मन्दिरमा पूजापाठ गर्नबाट बन्चित भएको बताए ।

वडाध्यक्ष रमेश कुशवाहाले गाँउको मन्दिरमा दलितलाइ प्रवेश र पूजापाठ गर्न गैह्र दलितबाट प्रतिबन्ध लगाइएको बारे थाहा नभएको बताए ।

उनले भने, ‘अब म यस बारेमा बुझेर विभेद हटाउन पहल गर्नेछु ।’