काठमाडौं : एक दिवसीय विश्व कप छनोटमा नेपालले आठौं स्थान हात पारेको छ । शनिबार भएको सातौं स्थानको प्ले अफ फाइनलमा नेदरल्यान्ड्ससँग ४५ रनले पराजित भएपछि नेपाल १० टोली सम्मिलत प्रतियोगितामा आठौं बनेको हो ।
प्रतियोगिताको सुपर सिक्स चरणमा पुग्न असफल भएपछि नेपालले सातौं स्थानको प्ले अफ खेलेको थियो । यद्यपि प्ले अफको पहिलो खेलमा पपुवा न्यूगिनीलाई ६ विकेटले पराजित गरेको नेपालले पहिलो पटक एक दिवसीय टोलीको मान्यता भने पक्का बनाएको छ ।
सन् २००५ देखि अन्तर्राष्ट्रिय क्रिकेट काउन्सिल (आईसिसी) को विश्व क्रिकेट लिग खेल्न सुरु गरेको नेपालले पहिलो पटक डिभिजन एकसहित एक दिवसीय टोलीको मान्यता पक्का गरेको हो । नेपाल आगामी चार बर्ष सन् २०२२ सम्म डिभिजन एक र एक दिवसीय टोलीको हैसियतमा रहने छ ।
प्ले अफको फाइनल खेलमा नेदरल्यान्ड्ससँग पराजित भएपछि भने नेपाल आठौं स्थानमा खुम्चिन पुगेको हो । जिम्बाबेमा टस जिती पहिले ब्याटिङमा आएको नेदरल्यान्ड्सलाई निर्धारित ५० ओभरमा नौं विकेट लिँदै एक सय ८९ रनको सहज योगफलमा समेटेको थियो । जवाफी ब्याटिङमा नेपालले ४४ दशमलव चार ओभरमा सबै विकेट गुमाएर १४४ रन मात्र बनाउन सक्यो ।
प्रतिक्रिया दिनुहोस !
