धनगढी क्रिकेट एकेडेमीलाई जेसीज कपको उपाधि

घोराही : दाङमा सञ्चालन भएको क्लब स्तरिय राष्ट्रिय क्रिकेट प्रतियोगिताको उपाधि धनगढी क्रिकेट एकेडेमीले जितेको छ । त्रिभुवन नगर जेसिजको आयोजना तथा दाङ क्रिकेट संघको प्राविधिक सहयोगमा सञ्चालन भएको प्रतियोगिताको फाइलन खेलमा जगबार क्रिकेट क्लबलाई ५९ रनले पराजित गर्दै धनगढी च्याम्पियन बनेको हो ।

दाङको घोराही क्रिकेट मैदानमा भएको फाइनल खेलमा धनगढी क्रिकेट एकेडेमीले २० ओभर खेल्दै ९ बिकेट गुमाएर एक सय ५१ रन बनाएको थियो । खेलमा धनगढीका बसन्तसिंह कार्कीले ४२, प्रकाश जैसीले ३० रनको योगदान गरेका थिए ।

एक सय ५२ रनको लक्ष्य पछ्याएको टिम जगवार क्रिकेट क्लबले १९ दशमलब ४ ओभरमा ९२ रन बनाउदै अलआउट भएको थियो । जगवारका लागि इमरान आलमले २१ रन बनाउनु बाहेक अन्य कुनै ब्याटसम्यानले उल्लेय प्रदर्शन गर्न सकेनन् ।

धनगढीका पवन कार्की र विनोद लामाले समान ३/३ विकेट लिएका थिए । त्रिभुवननगर जेसीजले सन् २०१६ देखि थालेको जेसीज कप क्रिकेट पहिलो वर्ष जिल्लास्तरिय, दोस्रो वर्ष अञ्चल र यसपालि राष्ट्रस्तरिय प्रतियोगिता सञ्चालन भएको हो ।

प्रतियोगीतामा देशका १६ क्लबको सहभागीता रहेको थियो । विजेता टिम धनगढी क्रिकेट एकेडेमीले एक लाख २५ हजारसहित शिल्ड प्राप्त गरेको छ । उपविजेता जगवार क्रिकेट क्लबले ५० हजार नगद सहित शिल्ड प्राप्त गरेको छ । यस्तै प्रतियोगीतामा न्यु होराईजन क्रिकेट एकेडेमीका कृष्ण कार्की उत्कृष्ट खेलाडी भए ।

त्यस्तै उत्कृष्ट ब्याट्सम्यान पनि कृष्ण कार्कीले प्राप्त गरे यस्तै उत्कृष्ट बलर सुनिल सुनार हुँदा जेसिस इमर्जिङ खेलाडी सन्देश पान्डे घोषित भएका थिए । उत्कृष्ट ब्याट्सम्यान, बलर र इमर्जिङ खेलाडीले समान १० हजार नगदसहित शिल्ड र प्रमाणपत्र प्राप्त गरे ।