काठमाडौँ: राजधानीका व्यापारीहरुलाई धम्की दिएर रकम असुलेको अभियोगमा प्रहरीले काभ्रेको भीरपोखरी गाउँपालिका-२ करमडाँडा घर भएका निमा लामालाई पक्राउ गरेको छ ।
गुण्डागर्दी र आपराधिक कृयाकलापमा संलग्न भएको अभियोगमा काभ्रेका गणेश लामालाई चार दिनअघि प्रहरीले पक्राउ गरिसकेको छ । आपराधिक क्रियाकलापमा संलग्न अर्का युवा पनि प्रहरीको फन्दामा परेका हुन् ।
प्रहरीका अनुसार सिनामङ्गलमा बस्दै आएका निमाले बानेश्वर, कोटेश्वर र काँडाघारी क्षेत्रमा रहेका व्यवसायीहरुलाई धम्की दिएर महिनावारी उठाउने गरेको खुलेको छ ।
उनले रकम नदिनेलाई मार्ने धम्की समेत दिएको महानगरीय प्रहरी परिसर काठमाडौँले जानकारी दिएको छ । सिनामङ्गलमा कपडा पसल खोले पनि उनको मूख्य काम भनेको व्यापारीहरुलाई धम्की दिएर रकम असुल्ने रहेको परिसरले जानकारी दिएको छ ।
लामाले रकम असुलीको नाममा आतंक मच्चाएपछि व्यवसायीहरुले प्रहरीलाई सूचना दिएका थिए । उनलाई हिरासतमा लिएर अनुसन्धान अघि बढाइएको प्रहरीले जनाएको छ ।
प्रतिक्रिया दिनुहोस !
