एसईईमा आमाछोरी

मलंगवा : चक्रघट्टा गाउँपालिकाकी ३४ वर्षीया मन्तोरदेवी राम छोरी १५ वर्षीया आरतीकुमारीसँगै माध्यमिक शिक्षा परीक्षा (एसईई) दिन पुग्दा बिहीबार अरू परीक्षार्थी अचम्मित बने । यी आमाछोरीले सुन्दरपुर सुखचैनास्थित देवधारी उच्च मावि परीक्षा केन्द्रबाट परीक्षा दिँदै छन् ।

चक्रघट्टा सगरदिना निवासी मन्तोरदेवी र आरतीकुमारी राम जनता मावि औरहीबाट नियमिततर्फ परीक्षामा सहभागी भएका हुन् । आमाछोरी परीक्षा केन्द्रमा पुग्दा उनीहरूलाई हेर्न घुइँचो लागेको थियो । मधेसी समुदायमा यस्तो घटना विरलै पाइने औरहीका सुरेश ठाकुरले बताए । सँगै परीक्षा दिने आमाछोरीको जोडीबाट अरूले हौसला पाउने उनको ठम्याइ छ ।

आरतीले १ कक्षादेखि नै उक्त विद्यालयमा पढे पनि मन्तोरदेवीले भने ८ मा भर्ना भएर अध्ययन थालेको विद्यालयले जनाएको छ । मन्तोरदेवी औरही स्वास्थ्य चौकीस्थित बर्थिङ सेन्टरमा सुडेनीको काम गर्छिन् । उनले ८ कक्षामा पनि छोरीसँगै परीक्षा दिएको प्रधानाध्यापक लक्ष्मीकान्त रायले बताए ।

३३६ विद्यार्थी अनुपस्थित

नियमिततर्फ आठ हजार पाँच सय ९२ जनाले फारम भरेकामा ५८ जनाले राजस्व नै नबुझाएको र राजस्व बुझाएकामध्ये पनि बिहीबार आठ हजार तीन सय ४८ जना मात्र सहभागी भएका छन् । जिल्ला शिक्षा कार्यालयको परीक्षा फाँट प्रमुख दीपक काफ्लेका अनुसार एक्जाम्टेडतर्फ पाँच सय ३९ जनाले फारम भरेकामा ८८ विद्यार्थी अनुपस्थित भए । प्राविधिकतर्फ एक सय ६० जनाले फारम भरे पनि चार जना अनुपस्थित भए ।