भक्तपुर : अझै २८ हजार क्षयरोगी उपचारको दायराबाट बाहिर रहेको एक तथ्याङ्कले देखाएको छ ।
नेपालमा वर्षेनी ४५ हजार नयाँ क्षयरोगी थपिए पनि ती मध्ये १३ हजार उपचारको दायरामा नआउने राष्ट्रिय क्षयरोग केन्द्र ठिमीले जनाएको छ ।
अन्तर्राष्ट्रिय क्षयरोग दिवसका अवसरमा शुक्रबार आयोजित पत्रकार सम्मेलनमा केन्द्रका निर्देशक डा. केदारनरसिंह केसीले भने, ‘नेपालमा नयाँ र पुराना गरी ६० हजार क्षयरोगी छन् तर गत आर्थिक वर्ष २०७३/०७४ मा ३१ हजार सात सय ६४ जना क्षयरोगका बिरामी राष्ट्रिय क्षयरोग कार्यक्रमको नीतिअनुसार उपचारमा रहेका छन् ।’
नेपालमा क्षयरोगका चार हजार तीन २१ उपचार केन्द्र, ९६ शहरी डट्स केन्द्र, ६सय ४ रोग निदान केन्द्र, २७ जीन एक्सपर्ट केन्द्र र दुई राष्ट्रिय प्रेषण प्रयोगशालामार्फत क्षयरोगको सेवा प्रदान गरिएको जानकारी डा. केसीले दिए । ।
क्षयरोगीको संख्या यकिन गर्न प्रारम्भिक सर्वे भइरहेको जानकारी दिँदै डा. केसीले ५५ जिल्लाका ९९ क्लस्टरका करीब ५७ हजारको घरदैलोमा प्रत्यक्ष पुगेर अत्याधुनिक डिजिटल प्रविधिद्वारा रोग निदान र परीक्षणको विधिद्वारा गरिने सर्वेले क्षयरोगको वास्तविक अवस्था पत्ता लाग्ने बताए । रासस
प्रतिक्रिया दिनुहोस !
