गीत गाउने सिडिओ, नाच्ने मुख्यमन्त्री

सिरहा: मोहनी लाग्ला है... गाउँलेको बोलीले

यो बोलको गीत जब बाराका प्रमुख जिल्ला अधिकारी विजय मानन्धरले गाउन थाले, तब सिरहा रेडक्रसका सभापति राजदेव यादवले नाच्न थाले । उनले प्रदेश २ का मुख्यमन्त्री मोहम्मद लालबाबु राउतलाई पनि मञ्चबाट उठाएर नचाउन थाले । लगत्तै अन्य अतिथिहरू पनि उनीहरूसँगै नाचे । मुख्यमन्त्री राउत जीवनमा पहिलो पटक नाचेका हुन् ।

प्रदेश २ का आठ जिल्लामध्ये सिरहा पहिलो खुल्ला दिसामुक्त घोषणा कार्यक्रममा मुख्यमन्त्री राउतसँगै प्रदेश २ का आर्थिक मामिला तथा योजना मन्त्री विजय यादव, प्रतिनिधिसभा सदस्यद्वय लीलानाथ श्रेष्ठ, बोधमाया यादव, प्रदेशसभा सांसद नरेश यादव, प्रमोद यादव लगायतका शिविष्ट अतिथिहरू पनि छमछमी नाच्न थालेका थिए ।

सबै अतिथिहरू एक अर्कासँग हात जोडेर गोलबद्ध भएर नाच्न थालेपछि कार्यक्रममा सहभागीहरू पनि कम्मर मर्काइ मकाइ नाच्न थालेका थिए ।

खुल्ला दिसामुक्त गर्न सिरहाका तत्कालीन सिडिओ मानन्धरले पुरानो सदाबहार हिन्दी गीत ‘रात कटे एक ख्वाब मे आए, और गले का हार बने’ बोलको गीत पनि गाए । खुल्ला दिसामुक्त कार्यक्रम कुनै सांस्कृतिक कन्सर्टभन्दा कम आकर्षण रहेन । दर्शकहरूले मनोरञ्चनको स्वाद लिए । प्रजिअ मानन्धर राष्ट्रभक्ति गीतको एम्बम समेत बजारमा ल्याएका छन् । उनले एक वर्ष सिरहामा बसेभन्दा आज सबभैन्दा खुसीको महसुस भएको बताए ।

यसअघि चर्चित गायिका जुली झाले पनि मैथली गीत गाएर मुख्य अतिथि, अतिथि तथा दर्शकहरूलाई मनोरञ्जन प्रदान गरे । उनले ‘कौने रे मासे राजा बलमजी विदेशीया गलै है नन्दो’ बोलको पुराना परम्परागत मैथिली गीत गाइन् ।

उनले गीत गाउँदा मुख्यमन्त्री राउतले ताली बजाएका थिए । कार्यक्रममा जनकपुरका कलाकर्मीहरुले पनि अनेकौँ गीतमा नृत्य देखाएर स्टेज तताए । नृत्यका क्रममा दर्शकहरूले बजाउने तालीले रौनकता थपिएको थियो ।