काठमाडौं : वनस्पति विभागको अनुसन्धानबाट पाँच हजार तीन सय नौ फूल–वनस्पतिको पहिचान गरेको छ । विभागले वनस्पतिको विवरण समेटी तीनवटा संग्रहित पुस्तक शुक्रबार सार्वजनिक गरेको छ ।
द फ्लोरिङ प्लान्ट अफ नेपाल, अ हेन्डबुक अफ फ्लोरिङ अफ नेपाल (भोलुम एक) र रामापिथेकस वनस्पति उद्यानका वनस्पतिहरू नामक पुस्तक प्रकाशन भएको हो । जसमा पाँच सय ८० उन्यू प्रजाति भेटिएको उल्लेख छ । नेपालमा मात्र एक सय ९३ वनस्पति परिवार छन् । यसमा एक हजार पाँच सय १५ जाति र पाँच हजार तीन सय नौ प्रजातिको फूल फुल्ने वनस्पति रहेको अध्ययनले देखाएको छ । फूल फुल्ने प्रजातिमा मोथे एक सय १०, पाषणवेद ८७, ६६, ६१, नेपाली नामसँग जोडिएको दुई सय ४६ लगायत छन् ।
विभागले सर्वेक्षण तथा वनस्पतिका नमूना संकलन गरेर काम गर्दै आएको छ । नेपालमा करिब सात हजार प्रजातिको फूल फुल्ने वनस्पति रहेको अनुमान छ । चीन, जापान, यूके अमेरिका र नेपालका वनस्पतिविदको सहभागितामा फ्लोरा कार्याशाला आयोजना गरी फूल फुल्ने वनस्पतिको अध्ययनलाई थप प्रभावकारी बनाउँदै आएको विभागका महानिर्देशक सञ्जिवकुमार राईले बताए । पुस्तकले विद्यार्थी, अनुसन्धानकर्ता, संरक्षणकर्मी, नीति–निर्माता, योजनाकार र उद्योग व्यवसायीका लागि सहयोग पुग्ने विभागले जनाएको छ ।
जैविक विविधता महासन्धिको पक्षराष्ट्र भएसँगै नेपालले आफ्नो देशमा भएका वनस्पतिको खोज–अनुसन्धान गरी नामांकनसहित संग्रहित गर्नुपर्ने हुन्छ । २०७७ सालसम्ममा नेपालमा पाइने करिब सात हजार प्रजातिका फूल फुल्ने वनस्पतिको पहिचान गरी संरक्षण गर्ने लक्ष्य छ ।
प्रतिक्रिया दिनुहोस !
