महायज्ञ उद्घाटन गर्दै मुख्यमन्त्रीले भनेः असल काम गरे धर्म मिल्छ
महेन्द्रनगरः प्रदेश नम्बर ७ का मुख्यमन्त्री त्रिलोचन भट्टले प्रदेशे यस क्षेत्रको पर्यटन विकासलाई प्राथमिकतामा राखेर काम थाल्ने बताएका छन् ।
आइतवार कञ्चनपुरको बेदकोट–४ बैतडामा शुरु भएको श्रीमद् भागवत धार्मिक महायज्ञको उद्घाटन गर्दै उनले यस्तो कुरा बताएका हुन् ।
‘हाम्रो प्रदेश पर्यटकीय हिसाबले निकै भरिपूर्ण छ’ उनले भने, ‘अब पर्यटकीय क्षेत्रको विकासमा ध्यान दिएर यस प्रदेशलाई आर्थिकरुपमा सबल बनाइने छ’ । उनले प्रदेश सरकारले पर्यटकीय क्षेत्रको विस्तार र विकासका लागि आवश्यक योजना ल्याउने बताए ।
‘यहाँका पर्यटकीय क्षेत्रहरुलाई प्राथमिकतामा राखेर पर्यटक ल्याउने वातावरण बनाइन्छ’, उनले भने,‘ निजीक्षेत्रको समेत त्यसमा सक्रियता हुनुपर्छ’ । मुख्यमन्त्री भट्टले प्रदेश नम्बर ७ को धार्मिक पर्यटन समेत मुख्य आधार भएको भन्दै यस क्षेत्रका विभिन्न धार्मिक क्षेत्रको संरक्षण आर्थिक विकास गर्नुपर्ने बताए ।
‘पर्यटकीयस्थलसम्म सडक विस्तार नभएले यस क्षेत्रका पर्यटकीयस्थल ओझेलमा परेका छन्’ मुख्यमन्त्री भट्टले भने, ‘अब विकाससमेत सँगसँगै लानुपर्छ’ । उनले तराई, पहाड र हिमाल जोड्ने मार्ग विस्तारका लागि प्रदेश सरकारले प्राथमिकताका साथ काम गर्ने बताए ।
दिपायल–खुटिया र दैजी–जोगबुढा सडक विस्तारका लागि प्रदेश सरकारले संघीय सरकारलाई घचघच्याउने उनको भनाई छ ।
महायज्ञ उद्घाटनमा उनले मानिसले असल सामाजिक कर्म गर्न सके स्वतः धर्म प्राप्ति हुने बताए । धार्मिक परम्पराका नाममा कसैलाई अन्याय र हानी पुग्ने काम कसैबाट हुन नहुने उनको भनाई छ ।
फोटो क्याप्सन ः श्रीमत भागवत धार्मिक महायज्ञको उद्घाटनमा सहभागी मुख्यमन्त्री सहितका अतिथीहरु ।
तस्बीर ः अन्नपूर्ण
प्रतिक्रिया दिनुहोस !
