काठमाडौं : मालिका केशरीको उपन्यास सुवर्णलतामाथि अन्तरसंवाद कार्यक्रम सम्पन्न भएको छ । नेपाल पर्यटन बोर्डमा आयोजित कार्यक्रममा साहित्यकार अमर न्यौपाने, प्रा. डा. रामप्रसाद ज्ञवाली र राम लोहनीले कृतिका बारेमा आफ्नो धारणा राखेका थिए। कृतिबारे बोल्दै न्यौपानेले भने, ‘पछिल्लो समय नेपाली उपान्यास लेखनमा धेरैको कलम चलेको छ ।
उपन्यासको भीडमा सुवर्णलता छुट्टै पहिचानका साथ उभिएको छ । उपन्यास लामो भएकाले केही बोझिलो लाग्न सक्छ । लेखकले यसमा दुईवटा कथा जोडेका छन् । एउटामा वर्तमान जीवनको चर्चा छ भने अर्को बुद्धकालीन समय छ ।’ उपन्यास लामो भए पनि गहन भावले पाठकलाई आकर्षण गर्न सफल भएको उनले बताए ।
बुद्धसँगको वार्तालापमा सरल भाषा प्रयोग गरिएका कारण बुद्धवाणी बुझ्न सहज रहेको उनले चर्चा गरे । रामप्रसाद ज्ञवालीले ‘सुवर्णलता’ले पाठकलाई सुरुदेखि अन्त्यसम्म कौतुहलतामा राख्न सफल रहेको बताए । लेखकले प्रेमसँगै ग्रामीण र सहरी परिवेशका पात्रलाई बौद्धिक तवरले प्रस्तुत गरेको उल्लेख गरे । सामान्य भाषामा बौद्धधर्मको चर्चा भएकाले बौद्ध दर्शनप्रति जिज्ञासु पाठकलाई उपन्यासले उत्सुक बनाउने उनको धारणा थियो ।
राम लोहनीले भने, ‘उपन्यासले फरक विषय वस्तु उठाएको छ । पाठक जुन कथामा प्रवाहित भइरहेको हुन्छ, उपन्यासको मध्यभागमा पुग्दा अर्कै संसारमा विचरण गर्न पुग्छ । त्यो संसार हो बुद्धको संसार ।’ उपन्यासमा बुद्ध जीवितै हुन्छन् । बुद्धसँग उपन्यासकी नायिकाको वार्तालाप र प्रेम प्रस्ताव अत्यन्त मार्मिक छ ।
भोग र त्यागमा कसको विजय होला त भन्ने प्रश्नमा बाँधिएर पाठकहरु रोमाञ्चक हुँदै अत्यसम्म पुग्न हतारिने विश्वास उनले व्यक्त गरे ।
लेखक केशरीले पाठकबाट पाएको मायाले नयाँ ऊर्जा प्राप्त भएको भन्दै आफूमाथि नयाँ जिम्मेवारी थपिएको बताएका छन् ।
आफ्नो प्रयासलाई पाठकले मन पराएकै कारण बजारमा आएको छोटो समयमै सुवर्णलताको दोस्रो संस्करण आउन लागेको पनि उनले खुलासा गरे । सुवर्णलता उपन्यास सांग्रिला बुक्सले बजारमा ल्याएको हो ।
प्रतिक्रिया दिनुहोस !
