'भारतसँगको सम्बन्ध नयाँ उचाइमा'

सिमरा : प्रधानमन्त्री केपी ओलीले नेपाल-भारत सम्बन्धले अहिले नयाँ उचाइ लिइरहेको बताएका छन् ।सिमरास्थित विशेष आर्थिक क्षेत्रभित्र बन्न लागेको गार्मेन्ट प्रशोधन क्षेत्रको आइतबार शिलान्यास गरेपछि प्रधानमन्त्री ओलीले यस्तो बताएका हुन् । भारतसँगको सम्बन्ध पहिलेजस्तो नरहेको उल्लेख गर्दै उनले अब कतिपयलाई विश्वास नलाग्ने गरी सम्बन्ध सुमधुर हुँदै गएको बताए ।

उनले चैत २३ गतेदेखि हुने भारत भ्रमण मुलुकका लागि उपलब्धिमूलक हुने विश्वास व्यक्त गरे । ‘भारत हाम्रो साथमा छ, यसो भनिरहँदा कतिपयलाई विश्वास नहुन सक्छ’, उनले भने, ‘तर, नेपाल र भारतको सम्बन्धले नयाँ उचाइ लिएको छ ।’

उनले नेपालको विकासमा सहयोगी भूमिका निर्वाह गर्न भारत र चीन दुवै मुलुक तयार रहेको बताए । दुवै मित्र राष्ट्रसँग सहकार्य गरेर नेपालको विकासलाई अघि बढाइने जानकारी दिँदै उनले अब देशको समृद्धिमा सबै एकजुट हुनुको विकल्प नरहेको बताए ।

उनले देश र जनतालाई आवश्यकता भए सार्वभौम र अखण्डतामा असर नपर्ने गरी संविधान र कानुन परिवर्तन गर्न कुनै समस्या नरहेको बताए । ‘कसैले केहीका लागि जिद्दि गर्नु छैन । लडाइँ देशका लागि लड्ने हो, आफ्नो इगोका लागि होइन’, उनले भने, ‘देश र जनतालाई चाहियो भने सबै कुरा परिवर्तन हुन सक्छ, कसैले लडाइँ गर्नुपर्दैन ।’

मुलुक नयाँ र आधुनिक युगमा प्रवेश गरिसकेको उल्लेख गर्दै उनले सोच परिवर्तन गरी देशको हितका निम्ति अघि बढ्न सबैलाई आग्रह गरे । संघीयतामा प्रवेश गरेसँगै मुलुक अहिले नयाँ अभ्यासमा रहेको सुनाउँदै उनले समृद्धिको अभियानका आइपरेका समस्या चिर्दै अघि बढ्नुपर्ने बताए ।

‘संघीय, प्रदेश र स्थानीय गरी अहिले सात सय ६१ सरकार छन्’, उनले भने, ‘अब सबैले मिलेर काम गर्नुपर्छ, प्रदेशलाई केन्द्र र यी दुवैले स्थानीय सरकारलाई सहयोग गर्नुपर्छ । अब नेपाल गरिबीमा रहन सक्दैन । स्रोत र साधनलाई देश विकासमा प्रयोग गर्नुपर्छ ।’ प्रदेश २ सबैभन्दा बढी सम्भावना भएको प्रदेश रहेको उल्लेख गर्दै उनले विकासका निम्ति सबैलाई एकजुट भएर अघि बढ्न आग्रह गरेका थिए ।

‘एक जनप्रतिनिधि एक विद्यार्थी’

उनले निरक्षरताविरुद्ध वैशाख ५ गते विद्यार्थी भर्ना दिवस मनाउने तयारी रहेको जानकारी दिए । समृद्धिको मुख्य आधारका रूपमा शिक्षाबाट कोही पनि वञ्चित हुन नहुने भन्दै उनले वैशाख ५ गते देशभरका जनप्रतिनिधिले एक जना बालबालिका विद्यालय लगेर भर्ना गर्नुपर्ने स्पष्ट पारे । ‘निरक्षरताविरुद्ध अभियान सञ्चालन गर्ने तयारी छ । वैशाख ५ गते एक जनप्रतिनिधिले एक जना बच्चालाई विद्यालय लगेर भर्ना गर्न सुरु गरौं’, उनले भने, ‘म आफैंंले मधेसको जिल्लाबाट यो अभियान सुरु गर्दै छु । केही वर्षमा विद्यालय भर्ना गर्न बालबालिका भेटिन्नन् । यसरी हामी सफल हुन सक्छौं ।’

उनले तराईका जिल्लामा चिसोका कारण कठ्यांग्रिएर मृत्यु हुन नदिने गरी सरकार अघि बढ्ने बताए । अब कठ्यांग्रिएर मर्नुपर्ने अवस्था अन्त्य हुने दाबी उनले गरे । ‘तराईका जिल्लाबाट यस्तो समाचार आइरहन्छ, यस्तो दिनको अब अन्त्य हुन्छ’, उनले भने, ‘अब जाडोका कारण मृत्यु भएको समाचार आउँदैनन्, त्यसका लागि म प्रतिबद्ध छु । जनता भोक र चिसोका कारण मर्नुपर्ने दिन दोहोरिनेछैन ।’

‘बोक्सी भन्ने अधिकार छैन’

उनले महिलामाथि हुने हिंसा अन्त्य हुने पनि बताए । महिलालाई बोक्सी भन्दै धामीझाँक्री लगाएर बेइज्जत गर्ने, बहिष्कार गर्ने घटना सरकारले सहन नसक्ने स्पष्ट पार्दै उनले कसैले यस्तो गरेको पाइए कानुनी कारबाही गरिने चेतावनी दिए । बलात्कार, महिला हिंसाका घटनाका दोषीले छुट्कारा नपाउने उनले स्पष्ट पारे । सामाजिक अपराध गर्ने व्यक्ति छुटाउनका निम्ति सिफासिर लिएर आफूकहाँ नआउन र त्यस्ता घटनाका दोषीलाई उम्काउनका निम्ति सक्रिय नहुन उनले जनप्रतिनिधिलाई आग्रह गरे ।

‘अपराधीलाई छुटाउने सिफारिस मलाई नगर्नुहोला, अपराधी आफ्नो हँुदैन’, उनले भने, ‘अपराधी छुटाउने र ढाकछोप गर्ने काम जनप्रतिनिधिले पनि नगर्नुस्, यस्तो काम सभ्य समाजलाई स्वीकार्य हुँदैन ।’

उनले राजनीतिक आवरणमा हिंसा र अपराध गर्ने काम नगर्न आग्रह गरे । क्रान्तिका नाममा चन्दा असुली, जनतालाई आतंकित पार्ने काम अनुचित रहेको उनको भनाइ थियो । ‘देश समृद्धि, एकता र विकासको बाटोमा अघि बढिरहेको अवस्थामा एउटा कुनामा बसेर जनतालाई दुःख दिने र तर्साउने काम नगर्नुस्’, उनले भने ।

प्रदेश २ का मुख्यमन्त्री लालबाबु राउतले ‘आसन पाए पनि शासन नपाएको’ उल्लेख गर्दै प्रदेश सरकारलाई अधिकारसम्पन्न बनाउन प्रधानमन्त्री केपी ओलीको ध्यानाकर्षण गराएका छन् । कार्यक्रममा प्रदेशसभा सदस्य सुन्दर विश्वकर्मा र जितपुरसिमरा उपमहानगरपालिकाका मेयर डा. कृष्ण पौडेलले समृद्धिका निम्ति केन्द्र सरकारसँग सहकार्य गर्न तयार रहेको बताएका थिए ।

जितपुरसिमरा उपमहानगरपालिकाका ४, १४ र १५ नम्बर वडामा फैलिएको विशेष आर्थिक क्षेत्र (सेज) को ‘ए’ ब्लकलाई गार्मेन्ट प्रशोधन क्षेत्र बनाउन लागिएको हो । तीन सय ४३ बिघामा फैलिएको ‘ए’ ब्लकको एक सय ६५ बिघा जमिनमा प्रशोधन क्षेत्र बन्दै छ । यो क्षेत्रमा कपडाजन्य उद्योग रहने जनाइएको छ ।

चालू आर्थिक वर्षका लागि यो ब्लकको सडक निर्माणतर्फ ९४ करोड र प्रशासनिक भवन निर्माणतर्फ ३४ करोडको ठेक्का लगाएर काम भइरहेको छ । ‘ए’ ब्लकमा कम्पाउन्ड वाल, सडक, नालालगायत काम सम्पन्न भइसकेको छ ।

यो ब्लकमा ६३ प्लट बनाइएको छ । प्लट एक देखि डेढ बिघासम्मको छ । उद्योगी÷व्यवसायीले उद्योग स्थापना गर्न प्लट खरिद गरेर उद्योग निर्माण गर्ने जनाइएको छ । पाँचवटा ब्लक रहेको सेजको अन्य ब्लकमा पनि काम भइरहेको छ । उद्योग तथा कलकारखानालाई आवश्यक सुविधा एकै थलोमा उपलब्ध गराएर निर्यातजन्य उद्योगलाई प्रोत्साहन गर्ने उद्देश्यले एक दशकअघि सेजको अवधारणा ल्याएर निर्माण थालिएको थियो ।