सदरमुकामवासी नै पिउँछन् दूषित पानी

दैलेख : नारायण नगरपालिका र आसपासका क्षेत्रमा दैनिक रूपमा आपूर्ति हुँदै आइरहेको खानेपानीमा फोहर मिसिएर आउन थालेपछि आजभोलि स्थानियवासी दूषित पानी पिउन बाध्य भएका छन्् ।

उक्त नगरवासीले खानेपानी उपभोक्ता समितिले सदरमुकाम दैलेख बजार र यसका आसपासमा वितरण गर्ने खानेपानी पिउन योग्य नभएको भन्दै गुनासो गर्दै आइरहेका छन् । नगरपालिका १ देवकोटा चोकका मनोज थापाले धारामा धमिलो पानी आउन थालेपछि सबैले पानी छानेर उमालेर पिउने गरेको बताए । उनले भने, ‘फोहोर पानीका कारण रोग लाग्ने डरले दिनहुँ पानी उमालेर पिउने गरेका छौं ।’

यस्तै सोही नगरपालिका ६ की कमला योगीले धारामा फोहर पानी आउन थालेपछि खानेपानीको समस्या भएको बताइन् । उनले समितिको लापरवाहीले धारामा फोहोर पानी आएको आरोप लगाइन् ।

पाइप विभिन्न स्थानमा फुटेर फोहोर मिसिएपछि खानेपानीमा बजार क्षेत्रको फोहोर मिसिएकाले धारामा दूषित पानी आउन थालेको स्थानीयले बताएका छन् । समस्याबारे जानकार रहँदा रहँदै पनि खानेपानीप्रति नगरपालिका खानेपानी तथा सरसफाइ उपभोक्ता समितिले बेवास्ता गरेको स्थानीयले आरोप लगाएका छन् ।

नगर क्षेत्र र आसपासका १ हजार ८ सय ५३ घरधुरीमा खानेपानी आपूर्ति गरेको सो समितिले बृहत् सहारे खानेपानी आयोजना निर्माण भइरहेको र पानी प्रशोधन केन्द्र सफा हुन समय लाग्ने बताएको छ । सो समितिका अध्यक्ष बलराम श्रेष्ठले आयोजना समितिलाई हस्तान्तरण नभएको बताउँदै पुरानो आयोजनाबाटै खानेपानी वितरण गरेको र नयाँ आयोजनाबाट परीक्षण मात्र गरेको दाबी गरे । उनले समितिबाट निर्माण कम्पनीलाई छिटो काम सम्पन्न गर्न दबाब दिइरहेको भन्दै समितिसँग जनशक्ति र उपकरण नभएकाले समितिले यस्ता मर्मत गर्न कठिनाइ भएको स्वीकारे ।

तर, समितिले पुराना आयोजनाका धाराहरू बन्द गरी परीक्षणमा ल्याएको आयोजनाको धाराबाट फोहर पानी उपलब्ध गराएको देखिएको छ । सो पानी पिउन योग्य या अयोग्यबारे कुनै प्राविधिक जाँच गरिएको प्रतिवेदन उपभोक्ता समितिसँग छैन ।

पुरानो आयोजनाबाट सञ्चालन भएको खानेपानी बन्द गरेर नयाँ आयोजनाको फोहोर पानी धारामा दिनुभन्दा केही दिन पानी वितरण रोक्नुपर्ने उपभोक्ताको सुझाव रहेको छ । हाल नयाँ आयोजनाबाट सञ्चालन भएको पानीको शुद्धता परीक्षण गर्नुपर्ने भए पनि हालसम्म त्यस्तो गरिएको छैन । पानीको शुद्धता नै परीक्षण नगरी धारामा पानी पठाउँदा उपभोक्ताहरू फोहोर पानीका कारण मर्कामा परेका छन् ।