बोआओ सम्मेलनमा नेपाल सहभागी नहुने
काठमाडौं : नेपालले आइतबारदेखि सुरु हुने बोआओ फोरम (बीएफए) सम्मेलनमा सहभागिता नजनाउने भएको छ । चीनको हेनान प्रान्तको बोआसो सहरमा चार दिनसम्म चल्ने सम्मेलनमा नेपालका तर्फबाट उच्चस्तरीय प्रतिनिधित्व नहुने परराष्ट्र मन्त्रालयका अधिकारीले जानकारी दिए ।
उनका अनुसार प्रधानमन्त्री केपी ओली सम्मेलनमा सहभागी हुने चर्चा चले पनि भारत भ्रमणको समयसँग जुधेपछि अन्तिममा नेपालका तर्फबाट उच्चस्तरीय सहभागिता नभएको हो ।
प्रधानमन्त्री ओली भारतको तीनदिने राजकीय भ्रमणमा छन् । उनी आइतबार साँझ स्वदेश फर्कंदै छन् । बोआओ सम्मेलनलाई नेपालले विशेष महत्व दिँदै आएको छ ।
अघिल्लो वर्ष तत्कालीन प्रधानमन्त्री पुष्पकमल दाहाल, दुई वर्षअघि प्रधानमन्त्री रहेका अहिलेका प्रधानमन्त्री केपी ओली, पूर्वराष्ट्रपति रामवरण यादव, पूर्वराजा ज्ञानेन्द्र शाहले पनि सम्मेलनमा सहभागिता जनाइसकेका छन् ।
‘विश्वको बृहत्तर समृद्धिका लागि खुला र नवीन एसिया’ नारा दिइएको बोआओ सम्मेलन उद्घाटन चिनियाँ राष्ट्रपति सि चिनफिङले गर्ने कार्यक्रम छ । उनी तेस्रो पटक सम्मेलनमा सहभागी हुन लागेको चिनियाँ सञ्चारमाध्यमले जनाएका छन् ।
चिनियाँ राष्ट्रपति चिनफिङले सम्मेलनमा सहभागी देशका राष्ट्र÷राज्य प्रमुखसँग भेटवार्ता गर्ने कार्यक्रम छ । सम्मेलनमा एसियाको अर्थतन्त्र, बेल्ट एन्ड रोड इनिसियटिभ (बीआरआई), विश्वव्यापी चुनौतीलगायत विषयमा छलफल हुनेछ । सम्मेलनमा अस्ट्रिया र फिलिपिन्सका राष्ट्रपति, मंगोलिया, नेदरल्यान्ड्स, पाकिस्तान र सिंगापुरका प्रधानमन्त्री सहभागी हुँदै छन् भने संयुक्त राष्ट्रसंघका महासचिव एन्टोनियो गुटेरेस र अन्तर्राष्ट्रिय मुद्रा कोषका प्रबन्ध–निर्देशक क्रिस्टिन लगार्दको पनि सहभागिता रहनेछ ।
सन् २००१ को फेबु्रअरीमा बोआओ फोरम फर एसियाको औपचारिक उद्घाटन भएको थियो भने पहिलो बैठक १२/१३ अप्रिल, २००२ मा भएको थियो । त्यसपछिका सम्मेलन पनि बोआओ सहरमा निरन्तर रूपमा हुँदै आएको छ ।
प्रतिक्रिया दिनुहोस !
