एकल नाटक महोत्सवको मैझारो
काठमाडौं : सर्वनाम थिएटरले आफ्नो ३६औं वार्षिकोत्सवका अवसरमा आयोजना गरेको अन्तर्राष्ट्रिय एकल नाटक महोत्सव सकिएको छ । चैत १९ देखि सुरु भएको महोत्सवको अन्तिम दिन तीन नाटक प्रदर्शन गरिएको थियो । नेपालको एउटा र हङकङका दुई नाटक मञ्चन गरिएका थिए ।
नेपालबाट वीरेन्द्र हमालको निर्देशनमा ‘देउकासी’ सुरुमा मञ्चन गरियो । पुरु लम्सालको लेखन रहेको नाटकमा सुशीला थापाले अभिनय गरेकी थिइन् । ६५ वर्षीया अविवाहित महिलाको कथालाई नाटकमा देखाइएको थियो ।
पछिल्ला दुई नाटक हङकङका तर्फबाट प्रदर्शन गरिएको थियो । दोस्रो नाटक ‘सिटी फ्लेस’मा हङकङकी इदी लम फुन हिउको लेखन, निर्देशन तथा अभिनय रहेको थियो । करिब ३० मिनेटको नाटकमा एउटी केटीले सहरमा कुनै पनि ठाउँ नपाएको कथा छ ।
हङकङकै अर्को नाटक ‘फिप्टी इअर्स रिमेनिङ अनचेन्ज्ड’ मक चिउ युले प्रस्तुत गरेका थिए । उनकै लेखन, निर्देशन तथा अभिनय रहेको नाटकमा मकले दर्शकलाई मज्जाले हँसाएका थिए ।
कार्यक्रममा लन्डनबाट नाटक मञ्चनका लागि आएका निर्देशक माइकल उडउडले यो महोत्सवले सम्पूर्ण देशलाई एकै ठाउँमा भेला गराएको र नेपाललाई नजिकबाट चिन्न सहयोग गरेको बताए । महोत्सवमा सहभागी सबै स्वदेशी तथा विदेशी कलाकारलाई प्रमाणपत्र वितरण गरिएको थियो ।
महोत्सव समापन गर्दै सर्वनाम थिएटरकी प्रबन्ध निर्देशक डा. सावित्री कक्षपतिले सर्वनामले शून्य बजेटमा पनि अन्तर्राष्ट्रियस्तरको महोत्सव आयोजना गर्न सफल भएकोमा सम्पूर्ण रंगकर्मी तथा स्वयंसेवकलाई धन्यवाद दिए । चार दिनसम्म चलेको महोत्सवमा १४ नाटक मञ्चन भएका थिए ।
प्रतिक्रिया दिनुहोस !
