माथिल्लो तामाकोसी जलविद्युत् आयोजना नौ महिनाभित्र सक्न प्रधानमन्त्रीको निर्देशन

दोलखा : प्रधानमन्त्री केपी ओलीले स्वदेशी लगानीको सबैभन्दा ठूलो राष्ट्रिय गौरवको माथिल्लो तामाकोसी जलविद्युत् आयोजना अबको नौ महिनाभित्र (आगामी पुससम्ममा) विद्युत् उत्पादन हुने गरी काम गर्न निर्देशन दिएका छन् । नेपालका लागि चिनियाँ राजदूत यु होङसहितको टोली लिएर बुधबार आयोजनास्थल पुगेका ओलीले यस्तो निर्देशन दिएका हुन् । आयोजनाका सम्बन्धमा सरकारका कुनै पनि निकायले लापरबाही वा गैरजिम्मेवारीपन देखाए आफूलाई सीधै जानकारी गराउनसमेत प्रधानमन्त्री ओलीले आयोजनाका कर्मचारीलाई निर्देशन दिएका छन् ।

भूमिगत विद्युत्गृहको निरीक्षणपश्चात आयोजनाका प्रमुख कार्यकारी अधिकृत विज्ञानप्रसाद श्रेष्ठको ब्रिफिङ सुनेपछि प्रधानमन्त्री ओलीले निर्धारित समयभन्दा एक दिन पनि ढिला नगरी आयोजना सम्पन्न हुनुपर्नेमा जोड दिए । ओलीले एक दिन पनि विद्युत् उत्पादन ढिला भए दैनिक चार करोडको घाटा हुने उल्लेख गरे । आयोजनाका ६ मध्ये पहिलो युनिटबाट आगामी २०७५ पुससम्ममा विद्युत् उत्पादन गर्ने कार्यतालिका छ ।

आयोजनाका प्रमुख कार्यकारी अधिकृत श्रेष्ठले हाइड्रो–मेकानिकलतर्फको भारतीय ठेकेदार टेक्सम्याको रेल्वे इन्जिनियरिङले ढिलो काम गरेको कारण आयोजना निर्धारित समयमा सम्पन्न नहुने प्रधानमन्त्री समक्ष अवगत गराए । उनले कूटनीतिक माध्यम प्रयोग नै गरेर भए पनि काम छिटो गराउन पहल गर्नुपर्नेमा जोड दिएका दिए । राष्ट्र बैंकले डलर सटहीमा ढिलासुस्ती, लामोसाँघु–जिरी सडकको स्तरोन्नतिमा भएको ढिलाइका कारण आयोजना समस्या रहेको श्रेष्ठले जानकारी गराएका थिए ।

निर्माणाधीन ४५६ मेगावाट क्षमताको आयोजनाको ९४.४० प्रतिशत कार्य सम्पन्न हुँदा ३७ अर्ब ७१ करोड रुपैयाँ भुक्तानी भइसकेको छ ।

प्रधानमन्त्री ओलीसहित ऊर्जामन्त्री वर्षमान पुन, ऊर्जा सचिव अनुपकुमार उपाध्याय, विद्युत् प्राधिकरणका कार्यकारी प्रमुख कुलमान घिसिङलगायतको टोलीले आयोजनाको लामाबगरस्थित बाँधस्थल, डिस्यान्डर बेसिनलगायत निरीक्षण गरेको थियो । दोलखाको विगु गाउँपालिका–१, लामाबगरमा निर्माणाधीन ४५६ मेगावाट क्षमताको आयोजनाको ९४.४० प्रतिशत कार्य सम्पन्न हुँदा ३७ अर्ब ७१ करोड रुपैयाँ भुक्तानी भइसकेको छ ।