काठमाडौँः ३३ किलो सुन तस्करीमा मुछिएका एक अभियुक्तले हिरासतमै आत्महत्या गरेका छन् । त्रिभुवन विमानस्थलमा लोडरका रुपमा कार्यरत प्रेमलाल चौधरीले महानगरीय प्रहरी वृत्त सिंहदरबारको हिरासतमै झुन्डिएर आत्महत्या गरेका हुन् ।
प्रहरीका अनुसार चौधरीले वृत्तको हिरासतमा रहेको शौचालयमा पासो लगाएर आत्महत्या गरेका हुन् । उनीमाथि ३३ किलो सुन तस्करीमा मतियार भएको आरोप लगोको थियो । चौधरीलाई तीन दिनअघि प्रहरीले पक्राउ गरेको थियो ।
प्रहरीकै मिलेमतोमा ३३ किलो सुन लुटपाट भएको आशंकामा गृह मन्त्रालयद्वारा गठित छानविन समितिले विस्तृत अनुसन्धान थालेको छ । समितिले हालसम्म २० जनालाई नियन्त्रणमा लिइसकेको थियो ।
गृह मन्त्रालयका अनुसार पक्राउ पर्नेमा थाई एयरलाइन्सका ११ जना कर्मचारी, नेपाल एयरलाइन्सका तीन जना कर्मचारी र अन्य व्यवसायी छन् ।
समितिले केही दिन अघि मात्रै मनाङ होटलका मालिक भुजुङ गुरुङलाई समेत नियन्त्रणमा लिएको थियो । त्यसैगरि व्यवसायीहरु बालकृष्ण श्रेष्ठ, कपिलराज पुरी, गोपाल कुमार श्रेष्ठ, दोराम खत्री, सम्बिर प्रसाद तोलाङ्गे, हेमन्त गौतम, ‘तक्लु’ भन्ने पुण्यप्रसाद लामा, विरेन्द्रमान श्रेष्ठ, लाल बहादुर मगर, राजु महर्जन र भारतीय नागरिक महाविर गोल्यान पक्राउ परिसकेका छन् ।
प्रतिक्रिया दिनुहोस !
