कालिका मन्दिरमा एकै महिनामा २८ लाख भेटी
बागलुङ : यहाँस्थित प्रसिद्ध कालिका भगवती मन्दिरमा गएको चैत महिनामा २८ लाख ९० हजार भेटी संकलन भएको छ। नगद भेटी, बोका, राँगो, कुखुराको टाउको, चामल, परेवा बिक्री र आर्थिक सहयोगसहित गरी सो रकम उठेको हो। १५ लाख ६९ हजार नगद भेटी चढेको मन्दिर गुठी व्यवस्थापन समितिले जनाएको छ।
दुई हजार १०० जोडी परेवा बिक्रीबाट आठ लाख ४५ हजार, बलि चढेका ३९५ बोकाको टाउको बिक्रीबाट तीन लाख ३१ हजार संकलन भएको हो। यस्तै, ९३ पाथी चामल बिक्रीबाट ५८ हजार, सिक्का सटहीबाट १५ हजार आम्दानी भएको छ। बलिको राँगो, कुखुराको टाउको, भक्तजनले चढाएको तेल, कपडा बिक्रीबाट आउने रकम पनि भेटीमा जम्मा हुने गरेको समितिका अध्यक्ष राजु खड्काले बताए।
सो अवधिमा दुई हजार ५५० नगद आर्थिक सहयोग प्राप्त भएको जनाइएको छ। बलि चढाएका बोकाका टाउको, परेवा, चामल, तेल, कपडा बिक्री, नगदलगायतबाट उठ्ने सबै रकम मन्दिरको मूल भेटीमा जम्मा हुने गरेको छ। अघिल्लो वर्षको तुलनामा गएको चैतमा तीन लाख ६३ हजारभन्दा बढी भेटी उठेको समितिले जनाएको छ। 'चैतेदशैँमा भक्तजनको घुइँचो लाग्ने हुँदा भेटी बढी उठेको हो', अध्यक्ष खड्काले बताए।
सोही बेला हुने चैत्राष्टमी मेलाका कारण पनि मन्दिर दर्शन गर्ने भक्तजनको संख्या वर्षेनी बढ्दो छ। बडादशैँ र चैतेदशैँमा मन्दिरमा ठूलो मेला लाग्ने गरेको छ। मन्दिरले वर्षमा रु एक करोडभन्दा बढी भेटीबाट आम्दानी गर्दै आएको छ।
समितिले हरेक महिनाको आय व्यय विवरण सार्वजनिक गर्दै आएको छ।जसअनुसार गएको चैत महिनामा एक लाख ४४ हजार खर्च भएको जनाइएको छ। रासस
प्रतिक्रिया दिनुहोस !
