पुलिसले ट्यांकर चालक कुटेपछि पेट्रोलियम ढुवानी रोकियो
वीरगन्ज: यहाँस्थित रक्सौल नाका एकजना ट्यांकर चालकलाई पुलिसले कुटेपछि पेट्रोलियम ढुवानी ठप्प भएको छ । रक्सौल नाकास्थित ईनरूवा प्रहरी चेक पोष्टका ईन्चार्ज सई बिनोद मल्लिकले एकजना ट्यांकर चालकलाई कुटपिट गरेको विरोधमा पेट्रोलियम ढुवानी ठप्प पारिएको हो ।
ना ३ ख ९६३९ नम्बरका ट्यांकर चालक सन्तोष प्रसाईलाई सई मल्लिकले कुटपिट गरी ४ घण्टा नियन्त्रणमा लिएको विरोधमा मजदुरहरूले इन्धन ढुवानी ठप्प पारेका हुन् ।
कुटपिट गर्ने सई मल्लिकलाई कारवाही नगरेसम्म तेल ढुवानी नगर्ने अडान मजदुरहरुले लिएका छन् । त्यसैगरी सरकारबाट सुरक्षाको प्रत्याभूति नभएसम्म ट्यांकर नचलाउने नेपाल यातायात स्वतन्त्र मजदुर संगठन (एनओेसी) रक्सौल ट्यांकर ईकाई अध्यक्ष पशुपति पाठकले बताए ।
'हाम्रा माग सम्बोधन नगरिएसम्म यस नाकाबाट चल्ने साढे ७ सय ट्यांकर चालकहरू काममा फर्किँदैनन्', उनले भने ।
आइतबार साँझ ६ बजे नेपाल आयल निगमको रक्सौलस्थित पार्किङमा ट्यांकर ब्याक गर्दैगर्दा सडक जाम गरेको भन्दै सई नेतृत्वको टोलीले चालक प्रसाईमाथि हातपात गरेको दाबी मजदुरहरुले गरेका छन् ।
'गाडी ब्याक गर्दैथिएँ, मेरो गाडीले कसैलाई अवरोध गरेको थिएन', प्रसाईले भने, 'त्यही बेला तलाईँ किन हतार भन्दै गालिगलोज गरेर ढोका खोल्न भनेपछि खोलिदिएँ । कागजपत्र दिँदा पनि छाडेनन्, कठालोमा समातेर दुईजनाले अन्धाधुन्ध पिट्न थाले ।'
प्रतिक्रिया दिनुहोस !
