रुकुम : गाडी दुर्घटनामा रुकुम(पश्चिम) चौरजहारी नगरपालिकाका प्रमुख विशाल शर्मासहित सात जना घाइते भएका छन् । नगरपालिकाको कार्यालय विजयश्वरीबाट वडा नम्बर ५ मा रहेको आधारभुत बिद्यालय लहरेसिमलमा बिद्यार्थीलाई निशुल्क पोषाक वितरण गर्न जादै गर्दा भएको दुर्घटनामा नगर प्रमुख शर्मासहित सात जना घाइते भएका हुन् । भे १ झ २४३ नम्बरको नगरपालिकाको गाडी मंगलबार बिहान ९ः४५ बजेतिर मेलैनाउँलीमा दुर्घटनामा परेको हो ।
दुर्घटनामा घाइते भएका ४३ वर्षीय नगर प्रमुख शर्मा, नगर कार्यपालिका सदस्य चौरजहारी वडा नं. ५ का ४३ वर्षीय लोकेन्द्र परियार, चौरजहारी नगरपालिका ३ का ४५ वर्षीय तेजवहादुर बटाला, गाडी चालक चौरजहारी नगरपालिका ७ का ४५ वर्षीय रामलाल शर्मा घाइते भएको जिल्ला प्रहरी कार्यालय रुकुम(पश्चिम)ले जनाएको छ ।
प्रहरीका अनुसार दुर्घटनामा घाइते हुने चौरजहारी नगरपालिका वडा नम्बर ४ की ३४ वर्षीया कमला बुढाथोकी, वडा नम्बर २ की ३४ वर्षीया पार्वती न्यौपाने र वडा नम्बर ७ का ४५ वर्षीय रामप्रसाद आचार्य रहेका छन् ।
नगर प्रमुख शर्माको बाँया हात भाँचिएको र टाउँकोमा चोट लागेको प्रहरीले जनाएको छ । खतरा मुक्त रहेको र अन्य घाइतेको अवस्था पनि सामान्य रहेको बताइएको छ । नगर प्रमुख शर्मालाई थप उपचारको नेपालगन्ज लगिएको छ भने अन्य घाइतेहरुको चौरजहारी अस्पतालमा उपचार भइरहेको छ ।
प्रहरीका अनुसार गाडी सडकबाट करिब १ सय मिटर तल खसेको थियो । नगर प्रमुख शर्मासहितको टोली बिद्यार्थीलाई पोषाक वितरण गरी मंगलबार नगरपालिकाको वडा नम्बर ११ खोलागाउँ पुग्ने कार्यक्रम रहेको थियो ।
प्रतिक्रिया दिनुहोस !
