साफ च्याम्पियनसिप फुटबल : नेपाल समूह ‘ए’ मा
काठमाडौं : बंगलादेशमा आगामी सेप्टेम्बर ४ देखि १५ तारिखसम्म आयोजना हुने साफ च्याम्पियनसिप फुटबल प्रतियोगितामा नेपाल समूह ‘ए’ मा परेको छ । बंगलादेशको ढाकामा बुधबार सार्वजनिक गरिएको समूह विभाजनमा नेपाल समूह ‘ए’ मा परेको हो । नेपालको समूहमा आयोजक बंगलादेश, पाकिस्तान र भुटान परेका छन् । समूह ‘बी’ मा साबिक विजेता भारत, माल्दिभ्स र श्रीलंका रहेका छन् ।
यसअघिको संस्करणमा फाइनलसम्मको यात्रा तय गरेको अफगानिस्तान भने यसपटक प्रतियोगितामा सहभागी छैन । अफगानिस्तानले यसअघि नै आफ्नो स्तर नमिल्ने भन्दै दक्षिण एसियाली फुटबलमा सहभागी नहुने निर्णय गरेको थियो ।
बंगलादेशको राजधानी ढाकास्थित बंगबन्धु राष्ट्रिय स्टेडियममा सञ्चालन हुने च्याम्पियनसिपमा नेपालले समूहगत चरणको पहिलो खेल सेप्टेम्बर ४ तारिखमा पाकिस्तानसँग खेल्नेछ । यसैगरी नेपालले ६ तारिखमा भुटानसँग दोस्रो र ८ तारिखमा बंगलादेशसँग तेस्रो खेल खेल्नेछ ।
लिगकम नकआउटका आधारमा सञ्चालन हुने च्याम्पियनसिपमा समूहका शीर्ष दुई टोली सेमिफाइनलमा प्रवेश गर्नेछन् । नेपाल अहिलेसम्म साफ च्याम्पियनसिपको सेमिफाइनलभन्दा माथि उक्लन सकेको छैन । यसअघि प्रायः समूहगत चरणबाटै बाहिरिएको नेपाली टोली घरेलु मैदानमा सन् २०१३ मा भने सेमिफाइनलमा पराजित भएको थियो ।
समूह विभाजन र खेलतालिका सार्वजनिक कार्यक्रममा साफका अध्यक्ष काजी महमद सलाउद्दिन, महासचिव अनवारुल हाक्वी र च्याम्पियनसिपको मुख्य प्रायोजक सुजुकी मोटरका कर्पोरेट सल्लाहकार सइजी हमादालगायतका पदाधिकारीको उपस्थितिमा भएको थियो ।
प्रतिक्रिया दिनुहोस !
