भक्तपुर : आठ दिन नौ रात चल्ने भक्तपुरको बिस्केट जात्राको अन्तिम दिन बुधबार राति प्रहरीले सुरक्षाकर्मीमाथि ढुंगामुढा गर्ने ११ जना पक्राउ गरेको छ । प्रहरीमाथि ढुंगामुढा गर्नुअघि बिस्केट जात्रामा ढुंगामुढा गर्नेको पहिचान गर्न राखिएको सीसीटीभी क्यामेरासमेत फुटाइएको छ ।
महानगरीय प्रहरी परिसर भक्तपुरले प्रहरीमाथि ढुंगामुढा गर्ने र सीसीटीभी क्यामेरा फुटाउनेलाई सार्वजनिक मुद्दा दायर गर्ने भएको छ । प्रहरीले ढुंगामुढाको आरोपमा भक्तपुर नगरपालिका–२ का २२ बर्से विजय सुवाल र २६ बर्से सुमन कासुला, भक्तपुर नगरपालिका–१० का २३ बर्से मनिष माकजू र ३१ बर्से सुनिल गुरुङ तथा भक्तपुर नगरपालिका–३ नासमनाका ३८ बर्से सविन श्रेष्ठलाई पक्राउ गरेको हो ।
भक्तपुरको इताछेंका २६ बर्से सुरेन्द्र देशेमरु र १८ बर्से सशिस पञ्च, भक्तपुर–४ का १८ बर्से मनिष छुकां र सन्नी छुकां, २८ बर्से अर्जुन गपी र २२ बर्से लक्ष्मीप्रसाद दुवाललाई सुरक्षाकर्मीमाथि ढुंगामुढा गरेको आरोपमा नियन्त्रणमा लिइएको हो ।
उनीहरूलाई भक्तपुर नगरपालिका–५ टौमढीमा प्रहरीमाथि ढुंगामुढा गरिरहेका बेला पक्राउ गरिएको महानगरीय प्रहरी परिसर भक्तपुरका इन्स्पेक्टर मदन केसीले जानकारी दिए । जात्राको अन्तिम दिन बुधबार भक्तपुरका दुई ठाउँमा तीनपल्ट ढुंगामुढा भएको थियो । टौमढीमा प्रहरीमाथि ढुंगामुढा हुनुअघि वंशगोपालमा दुईपल्ट जात्रालुबीच ढुंगामुढा भएको थियो ।
भक्तपुरका प्रमुख जिल्ला अधिकारी द्रोण पोखरेलले बिस्केट जात्राको क्रममा हातहतियार लिएर हिँड्ने र प्रहरीमाथि ढुंगामुढा गर्ने तथा सीसीटीभी क्यामरा फुटाउनेहरूमाथि सार्वजनिक मुद्दा लगाउने जानकारी दिए । बुधबार टौमढी क्षेत्रका तीन वटा सीसीटीभी फुटाइएको थियो । सीसीटीभी क्यामेरा फुटाइसकेपछि प्रहरीमाथि ढुंगामुढा गरिएको हो । उनले सीसीटीभी क्यामरा फुटाउनेको पहिचान भइसकेको समेत जानकारी दिए ।‘सीसीटीभीको फुटेज हेरेर क्यामेरा फुटाउने पाँच जनाको पहिचान भइसकेको छ’, प्रजिअ पोखरेलले भने, ‘उनीहरू र बिस्केट जात्रामा हतियार बोकेर हिँड्ने तीन जनामाथि सार्वजनिक मुद्दा चलाउँछौं ।’ उनले यस वर्ष अन्तिम दिनको छिटपुट घटनाबाहेक समग्रमा जात्रा शान्तिपूर्ण सम्पन्न भएको दाबी गरे । ‘अब आउँदा वर्षमा पनि बिस्केट जात्रालाई यस वर्षजस्तै शान्तिपूर्ण मनाउनुपर्छ’, उनले भने ।
गःहिटीबाट वंशगोपाल तान्ने क्रममा सर्वसाधारणका घरमा भैरवनाथको रथ ठोक्काउँदै जबरजस्ती लगेपछि जात्रालुबीच नै ढुंगा हानाहान भएको प्रहरीले बताएको छ । सर्वसाधारणको घरमा क्षति पु¥याउँदै टेलिफोन र केबल टेलिभिजनका तार चुँडाल्दा पनि भैरवनाथको रथ एकातिरमात्र तानिएको थियो । एकातिरमात्र जबर्जस्ती रथ तान्दा विगतमा पनि ढुंगा हानाहान हुने गरेको थियो । यस वर्ष ढुंगा हानाहान भए पनि कुनै पनि जात्रालु र सुरक्षाकर्मी घाइते नभएको प्रहरी परिसर भक्तपुरले जनाएको छ ।
इन्स्पेक्टर केसीले बुधबार हातहतियार बोकेर हिँड्ने दुईजना युवालाई नियन्त्रण लिइएको जानकारी दिए । उनका अनुसार दुवैलाई भैरवनाथको रथ तान्नुअघि टौमढीबाट पक्राउ गरिएको हो । पक्राउ पर्नेमा भक्तपुर नगरपालिका–५ सुकुलढोका बस्ने १८ बर्से साजन माक र सूर्यविनायक नगरपालिका–६ बस्ने १६ बर्से समन भेले छन् । प्रहरीले उनीहरूबाट खुकुरी र हातमा लगाउने औंठीजस्तो नोक बरामद गरेको छ ।
प्रहरीले जात्राको पहिलो दिन चैत २७ गते पनि एक युवालाई हतियारसहित पक्राउ गरेको थियो । भक्तपुर नगरपालिका–४ बस्ने २४ बर्से राजन भेलेलाई हातमा धारिलो चुप्पी लिई जात्रामा अशान्ति पु¥याइरहेको अवस्थामा पक्राउ गरिएको थियो ।
प्रतिक्रिया दिनुहोस !
