स्वान्सीको पोस्टमा 'च्याम्पियन सिटी' को गोल बर्षा
काठमाडौँः यो सिजनको इङ्लिस प्रिमियर लिगको उपाधि पक्का गरिसकेको म्यानचेस्टर सिटीले स्वान्सी सिटीमाथि फराकिलो जित दर्ता गराएको छ । गएराति भएको खेलमा स्वान्सीलाई हराउने क्रममा पाँच फरक फरक खेलाडीले गोल गर्न सफल भए ।
उपाधि पक्का गर्ने क्रममा अंकतालिकामा १६ अंकको फराकिलो अग्रता बनाइसकेको सिटीका लागि गोलको खाता भने १२ औँ मिनेटमा डेभिड सिल्भाले खोले ।
त्यसपछि १६ औँ मिनेट रहिम स्टर्लिङले सिटीका लागि दोस्रो गोल गरे । पहिलो हाफमा २ गोल गरेको सिटीले दोस्रो हाफमा ३ गोल गर्यो ।
सिटीका लागि प्ले मेकरको भूमिकामा रहेका केभिन डे ब्रुनेले खेलको ५४ औँ मिनेटमा गोल गर्दै अग्रता ३–० मा पुर्याए । खेलको ६३ औँ मिनेटमा ग्याब्रियल जेसुसले प्रहार गरेको पेनाल्टी रिबाउन्ड भएर आएपछि ब्रेनार्डो सिल्भाले गोल गर्न सफल भए ।
पेनाल्टी चुकाएका जेसुसले खेलको ८८ औँ मिनेटमा गोल गर्दै सिटीको फराकिलो जित पक्का गरे । सिटीका प्रमुख स्ट्राइकर सर्जियो एग्युएरो घाइते भएपछि जेसुसले आक्रमणको जिम्मा पाएका थिए । सिटीका डिफेन्डर बेन्जामिन मेन्डे पनि स्वान्सीविरुद्धको खेलसँगै करिब ६ महिनापछि मैदानमा पुनः उत्रेका छन् ।
यो जितपछि सिटीले ९० अंक बनाइसकेको छ । उसलाई पछ्याइरहेको म्यानचेस्टर युनाइटेडले ७४ अंक बनाएको छ । पराजित स्वान्सी भने ३३ अंकसहित रेलिगेसन जोन नजिकै छ ।
प्रतिक्रिया दिनुहोस !
