गमगढी : मुगुम कार्मारोङ गाउँपालिका क्षेत्रमा पाइने बहुमूल्य जडीबुटी यार्सागुम्बा संकलनका लागि सर्वसाधारणलाई जेठ ५ गतेबाट खुला गरिने भएको छ ।
मुगुम कार्मारोङ गाउँपालिकाको चैत २६ गते बसेको कार्यपालिकाको बैठकले गाउँपालिका क्षेत्रमा पाइने यार्सा संकलन गर्न जिल्लाका बासिन्दा र बाहिरी जिल्लाबाट आउने सर्वसाधारणलाई खुला गर्न लागिएको हो ।
जेठ १ देखि ४ गतेसम्म वन प्रवेशका लागि गाउँपालिकाले कर उठाउने र कर बुझाएका संकलनकर्ताले ५ गते बिहान वन प्रवेश गर्न पाउने मुगुम कार्मारोङ गाउँपालिकाका निमित्त कार्यकारी अधिकृत गौरीकान्त चौलागाईंले जानकारी दिए ।
चौलागाईंका अनुसार जिल्लाभित्रका सर्वसाधारणबाट प्रतिव्यक्ति १ हजार ५ सय र बाहिरी जिल्लाबाट आउने संकलनकर्ताबाट २ हजार कर उठाइने भएको छ ।
मुगुम कार्मारोङ गाउँपालिका—२ मुगु गाउँको रिमार, ठूलोकोखी, स्यानो कोखी, चाल्ने, छापाखोला, हङदङ, सोही गाउँपालिको—१ मा रहेको से फोक्सुण्डो राष्ट्रिय निकुञ्जको वन क्षेत्र र वडा नम्बर ८ मह लेखमा सर्वसाधारणलाई यार्सा संकलनका लागि खुला गरिने र उक्त क्षेत्रबाट उठेको कुल रकममध्ये ३० प्रतिशत व्यवस्थापन खर्च ३० प्रतिशत सम्बन्धित गाउँपालिका र ४० प्रतिशत २ नम्बर वडाको विकासमा विनियोजित गरिनेछ ।
वडा नम्बर ८ महलेखबाट उठेको रकममध्ये १० प्रतिशत गाउँपालिका र बाँकी रकम वडाको विकासमा खर्च गरिने र वडा नम्बर २ मा रहेको से फोक्सुण्डो निकुञ्ज क्षेत्रबाट उठेको कुल रकमको १० प्रतिशत कार्मारोङ गाउँपालिकालाई छुट्याइनेछ ।
जेठ ५ गतेबाट असार ५ सम्म यार्सा पाइने स्थान संकलनकर्तालाई खुला गरिने भएको र संकलन अवधि भर संकलकलाई कुनै असुरक्षा र अप्रिय घटना हुन नदिन सशस्त्र प्रहरी र नेपाली प्रहरी परिचालन गरिने गाउँपालिकाले जानकारी दिएको छ ।
प्रतिक्रिया दिनुहोस !
