लन्डनमा ‘भाया साक्रा' नियात्रासङ्ग्रहको चर्चा
लन्डन : साहित्य चौतारी युकेको आयोजनामा बेलायत निवासी साहित्यकार कृष्ण बजगाईंको नियात्रासङ्ग्रह भाया साक्राको लन्डनमा अन्तरक्रिया सम्पन्न भएको छ । कार्यक्रममा समीक्षक विजय सापकोटा, डा रुपक श्रेष्ठ र वासु शर्माले कृतिका बारेमा आआफ्नो धारणा राखेका थिए ।
समालोचक विजय सापकोटाले धेरै समयपछि गहन विषयमा स्तरिय कृति नेपाली साहित्यमा आएको कुरा बताउँदै यस नियात्रासङ्ग्रहमा लेखकको अध्ययनको दायरा फराकिलो देखिएको बताए । उनले उक्त सङ्ग्रहबाट ज्ञान, विज्ञान, इतिहास र दर्शन आदिको अथाह जानकारी पाठकले पाउने बताए ।
साहित्यकार डा रुपक श्रेष्ठले भाया साक्रामा पोखिएको नेपाल राष्ट्र प्रेमको प्रशंसा गर्नु भयो । उहाँले उक्त सङ्ग्रहमा डायोस्पोरिक चेत रहेको बताउँदै नियात्रासङ्ग्रहमा पनि डायोस्पोरिकता ल्याउन सक्नु लेखकको विशेष क्षमता भएको बताए ।
साहित्यकार वासु शर्माले युरोपियन देशको भ्रमणका बारेमा लेखिएको यात्रामा लेखक जताततै नेपाल खोज्दै र सम्झँदै हिँडेको सुखद पक्षको चर्चा गर्दै भाया साक्राले शिक्षा मात्र हैन आनन्द पनि दिने बताए ।
नियात्राकार बजगाईंले आफूले विशेष मेहनत र अनुसान्धान पश्चात भाया साक्रा लेखेको बताउँदै आगामी दिनमा अरु नयाँ विषयमा यस्तै खोजमूलक नियात्रा लेख्ने बताए ।
कार्यक्रममा साहित्यकार गोपी सापकोटा, दिनेश पौडेल, अर्कराज तिम्सिना, विजय हितानले मन्तव्य व्यक्त गरेका थिए ।
प्रतिक्रिया दिनुहोस !
