केन्द्रले काटेको विदा प्रदेशले थप्यो, प्रदेश दुईमा सार्वजनिक विदा १० दिन बढ्यो
जनकपुरधामः संघीय सरकारले दिने सार्वजनिक विदाबाहेक प्रदेश २ मा प्रदेश सरकारले दश दिन थप गरेको छ । मन्त्रिपरिषदको निर्णय बमोजिम आन्तरिक मामिला तथा कानुन मन्त्रालयका सचिव देवीराम भण्डारीले यस प्रदेशमा दिइने तथा मनाइने थप विदा र उत्सवहरुको जानकारी सार्वजनिक गरेका छन् ।
थप गरिएका विदाहरुमा सर्वप्रथम जानकी नवमीलाई समावेश गरिएको छ । हालसम्म यस पर्वको लागि विदाको व्यवस्था नेपाल सरकारबाट नगरिएको हुनाले माता सीताको जन्म जयन्तीको विशेष पर्वको रुपमा मनाउन वैशाख ११ गते एक दिन विदा दिइने भएको छ ।
रक्षा बन्धनको अवसर पारेर भदौ १० गते, छठ पर्वको अवसर पारेर कात्तिक २७ र २८ गते दुई दिन विदा दिइने भएको छ । छठ पर्वमा हालसम्म एकदिन मात्रै विदा दिने गरिन्थ्यो । प्रदेशको राजधानीको शहर जनकपुर मनाइने मुख्य पर्व मध्येको विवाह पञ्चमीको अवसरमा हालसम्म विदाको व्यवस्था नरहेकोमा मंसिर २६ गते विदा हुने भएको छ ।
त्यसैगरी मधेस आन्दोलन स्मृति दिवसको अवसर पारेर माघ ५ गते विदा दिने प्रदेश सरकारले निर्णय गरेको छ । २०६३ साल माघ ५ गते तराई मधेसमा जनसरोकारका विषयलाई लिएर मधेसमा आन्दोल भएको हुनाले यस दिनलाई स्मृति दिवसको रुपमा मनाइने भएको छ ।
फागु पूर्णिमाको अवसरमा चैत्र ७ र ८ गते दुई दिन विदा हुने भएको छ । तराईमा दुई दिन यो पर्व मनाउने भएकोले दुई दिने विदा दिने जनाइएको छ । रामनवमीको अवसर पारेर विगत वर्षहरुमा सरकारले विदा दिने गरे पनि २०७५ सालदेखि काटिएको थियो ।
बाह् रबिऊल (पैगम्बर मोहम्मद) को जन्म दिनको अवसरमा १ दिन बिदा दिने निर्णय समेत प्रदेश सरकारबाट भएको हो ।
प्रतिक्रिया दिनुहोस !
