मिरपुर : एसियन भलिबल महासंघ (एभीसी) सेन्ट्रल जोन प्रतियोगिताअन्तर्गत बुधबार हुने सेमिफाइनल खेलमा नेपालले बलियो प्रतिद्वन्द्वी तुर्कमेनिस्तानसँग प्रतिस्पर्धा गर्दैछ । मिरपुरस्थित सहिद सुरवर्दी इन्डुअर स्टेडियममा हुने खेलमा नेपाल तुर्कमेनिस्तानसँग बदला लिने दाउमा छ । यसपटक उपाधि जित्ने योजनासहित बंगलादेश आएको नेपाली टोलीले तुर्कमेनिस्तानविरुद्ध जितकै योजना बनाएको छ । साबिक विजेता किर्गिस्तान र उज्बेकिस्तानलाई पराजित गर्दै समूह बी को विजेताको हैसियतमा सेमिफाइनल पुगेको तुर्कमेनिस्तान नेपालका लागि कठिन प्रतिद्वन्द्वी हो ।
तुर्कमेनिस्तानले किर्गिस्तानलाई ३-० तथा उज्बेकिस्तानलाई ३-१ को सेटमा पराजित गरेको थियो । बंगलादेशमै भएको पहिलो संस्करणको सेन्ट्रल जोन भलिबलको उपाधि जितेको तुर्कमेनिस्तानले यस प्रतियोगितामा पनि सशक्त प्रदर्शन गरेको छ । समूह चरणको खेलमा तुलनात्मक रूपमा कमजोर प्रदर्शन गरेकाले पनि नेपाललाई तुर्कमेनिस्तानको चुनौती मुस्किल हुने देखिएको हो । समूह एको दुईमध्ये पहिलो खेलमा बंगलादेशसँग २६-२४, १८-२५, १४-२५, २१-२५ ले पराजित भएको नेपाल दोस्रो खेलमा माल्दिभ्सलाई २५-२१, २५-१८, २५-१५ ले पराजित गर्दै सेमिफाइनलमा पुगेको हो ।
सेन्ट्रल जोन भलिबल प्रतियोगितामा हालसम्म भएको दुईमध्ये दुवै खेलमा पराजित भएकाले नेपाललाई तुर्कमेनिस्तान मुस्किल प्रतिद्वन्द्वी मानिएको हो । नेपाल गत वर्ष माल्दिभ्समा भएको सेन्ट्रल जोनको तेस्रो संस्करणमा तुर्कमेनिस्तानसँग २५-२०, २५-१८, २५-२२ को सोझो सेटमा पराजित भएको थियो । कप्तान इम रानामगर तुर्कमेनिस्तानविरुद्ध नेपाली टोलीले प्रदर्शनमा सुधार ल्याइरहेकाले यसपटक जितकै योजना बनाएको प्रतिक्रिया दिए ।
उनले तुर्कमेनिस्तानलाई पराजित गर्न आफूहरूले रिसिभमा सुधार ल्याउन आवश्यक रहेको पनि बताए । ‘उनीहरूको खेल राम्रो छ । तुर्कमेनिस्तानविरुद्ध पहिलो संस्करणमा हामी लज्जास्पद तरिकाले पराजित भएका थियौं । गत वर्ष हामीले उनीहरूलाई कडा टक्कर दिएका थियौं । यस पटक हाम्रो खेल पनि कमजोर छैन’, रानामगर भन्छन्, ‘उनीहरूको सर्भिस बलियो छ । त्यसैले रिसिभमा सुधार ल्याउन सक्यौं भने हामी बदला लिने छौं ।’
नेपाली टोलीका प्रशिक्षक जगदीश भट्टले तुर्कमेनिस्तानविरुद्धको जितका लागि रिसिभमा सुधार ल्याउनुपर्ने बताए । ‘तुर्कमेनिस्तान र नेपालका खेलाडीहरूको उचाइ उस्तै छ । प्राविधिक र रणनीतिक रूपमा हामी तुर्कमेनिस्तानभन्दा कमजोर छैनौं’, प्रशिक्षक भट्टले भने, ‘मात्रै जितका लागि हामीले रिसिभमा सुधार ल्याउनु पर्छ।’ जारी प्रतियोगितामा नेपालको भन्दा तुर्कमेनिस्तानको खेल केही ‘फास्ट’ देखिएको छ । उनीहरूलाई रोक्न ब्लकमा पनि राम्रो प्रदर्शन गर्न आवश्यक रहेको भट्टले बताए ।
प्रतिक्रिया दिनुहोस !
