पोखरा : प्रदेशसभामा मंगलबार सांसदले नियमापत्ति गर्दा सभामुख नेत्रनाथ अधिकारी निरीह छन् । कांग्रेसबाट निर्वाचित प्रदेश सांसद मेखलाल श्रेष्ठले प्रदेशसभाको विशेष समयमा बोल्दाबोल्दै माओवादी सांसद दीपक कोइराला र एमाले सांसद राजीव पहारीले नियमापत्ति गरेका थिए । सांसद श्रेष्ठले नेपाल कम्युनिस्ट पार्टी स्थापना दिवसका दिन एमाले अध्यक्ष केपी ओलीले खुट्टा ताछेर पनि जुत्ता लगाउनुपर्छ भनेर दिएको अभिव्यक्तिप्रति आपत्ति जनाउँदै विचार राखेका थिए । उनले कार्लमाक्स र लेनिनको नाम उल्लेख नगरी विदेशी नेताको फोटो खोज्ने काम उक्त सभामा भएको भन्दै त्यस्तो राष्ट्रवाद हुन नसक्ने उल्लेख गरेका थिए ।
सांसद कोइरालाले प्रदेशसभाको विषय र क्षेत्राधिकारभन्दा बाहिर गएर कम्युनिस्ट पार्टीका नेतामाथि अपमान गरेको भन्दै नियमापत्ति प्रकट गरे । पहारीले पनि सांसद श्रेष्ठले क्षमा माग्नुपर्ने बताए । तर, सभामुखले कुनै प्रतिक्रिया दिएनन् ।
प्रदेशसभा नियमावलीमा सांसदले नियमापत्ति गर्दा सभामुखले कुन नियममा आपत्ति हो उल्लेख गरी बोल्न स्वीकृति दिने उल्लेख छ । तर, सभामुख नेत्रनाथ अधिकारीले न नियमापत्ति गर्ने सांसद कोइराला र पहारीलाई बोल्न स्वीकृति दिए न सांसद श्रेष्ठलाई केही निर्देश गरे । माननीयज्यू तपाईंको समय सकियो भनेर श्रेष्ठलाई भने अनि उनी रोकिए । सांसद श्रेष्ठले प्रदेशसभाको क्षेत्राधिकारबाहिरकै र नियमापत्ति हुने कुरा अभिव्यक्त गरेकै भए पनि कोइराला र पहारी कुन नियममा उल्लंघन भयो भनेर उल्लेख गर्न सकेका थिएनन् ।
सभामुख नेत्रनाथ अधिकारीको कुनै रुलिङबिनै संसद् शान्त भएपछि संसद्को कार्यक्रम सरासर अघि बढ्यो । सभामुखले उद्योग, पर्यटन, वन तथा वातावरण मन्त्री विकास लम्साललाई संसद्मा उठेका प्रश्नको जवाफ दिन समय उपलब्ध गराएका थिए । लम्सालको जवाफमा कांग्रेस सांसद कुमार खड्काले नियमापत्ति गरे । खड्काले नियमसमेत उल्लेख गर्दै नियमापत्ति गरे । तर, त्यसमा पनि सभामुखले केही बोलेनन् । बरु मन्त्रीले नै प्रसंग फेरे । यसअघि पारित भइसकेको सरकारको नीति तथा कार्यक्रमलाई विपक्षी सांसदले विरोधका लागि विरोध गरेको मन्त्री लम्सालले बताएका थिए ।
त्यत्तिकैमा सांसद खड्काले पारित भइसकेको विषयबारे फेरि टिप्पणी गर्ने अधिकार मन्त्रीलाई नभएको भन्दै नियमापत्ति गरेका थिए । नीति तथा कार्यक्रमबारे उठेका सवालको जवाफ मुख्यमन्त्रीले यसअघि नै संसद्लाई दिइसकेको र नीति तथा कार्यक्रम पारित भइसकेको खड्काले बताएका थिए । संविधानसभामा सांसद खड्काले रीतपूर्वक नियमापत्ति गर्न सकेका थिए । तर, अघिल्ला २ सांसदले रीत पुर्याएनन् भने सभामुखले त्यस्तो बेला आफूले के गर्नुपर्छ भन्ने नै थाहा पाएनन् ।
.....
प्रदेशसभामा नियमापत्ति गर्दै सांसद राजीव पहारी । कृष्णमणि बराल ।
प्रतिक्रिया दिनुहोस !
