लज्जास्पद प्रदर्शनपछि गौतम गम्भीरले छाडे दिल्लीको कप्तानी
नयाँ दिल्ली: आईपीएल २०१८ मा निराशाजनक प्रदर्शनपछि गौतम गम्भीरले दिल्ली डेयरडेभिल्सको कप्तानबाट राजीनामा दिएका छन् । गम्भीरको स्थानमा मुम्बईका युवा ब्याट्सम्यान श्रेयस अय्यरलाई दिल्लीको कप्तानी दिइएको छ । कप्तानबाट राजीनामा दिए पनि गम्भीर टीमका सदस्य भने रहनेछन् ।
गौतम गम्भीरले दिल्ली डेयरडेभिल्सको कप्तानी छोड्ने क्रममा भनेका छन्, 'मैले टीमका लागि पर्याप्त योगदान दिन सकिन । कप्तान भएपछि मैले जिम्मेवारी लिनु पर्थ्यो । मलाई लाग्छ कप्तानी छाड्ने यो सही समय हो ।'
गम्भीरले अगाडि भने, 'मैले कप्तानको दबाव झेल्न सकेको थिइन । यसैकारण कप्तानबाट राजीनामा दिने निर्णय गरेँ। यो मेरो आफ्नो निर्णय हो । फ्रेन्चाइजीको कुनै दबाब ममाथि छैन । मैले यस निर्णयबारेमा पत्नीसँग पनि छलफल गरेको छु ।'
गम्भीरले कुनै कुराको परिवर्तनका लागि आफु आतुर भए पनि यसको उल्टो असर परेको बताएका छन् । 'मैले दबाब झेल्नै नसकेका कारण यस्तो निर्णय लिएको हुँ । यदि तपाईँले बाचा गरेको कुरा पुरा गर्न सक्नु हुन्न भने जिम्मेवारी लिनै पर्छ ।'
गम्भीरले अहिलेसम्म आईपीएलको अंकतालिकामा टीम अन्तिममा रहेकाले पनि त्यसको दोष आफूले लिनुपर्ने बताए । उनले टीमको प्रदर्शनलाई जिएर कप्तानी छोड्ने निर्णय लिएको बताए ।
‘मैले एक्लै यसमा गहन विचार गरेँ । मैले दबाब झेल्न सकिन म यो जिम्मेवारीका लागि राम्रो स्थितिमा थिइनँ', उनले भने । यो पत्रकार सम्मेलनमा फ्रेन्चाइजीका सीईओ हेमन्त दुआ र प्रशिक्षक रिकी पोन्टिङ्ग पनि उपस्थित थिए।
दिल्लीलाई च्याम्पियन बनाउने बाचा
गौतमले दुई पटक कोलकाता नाइट राइडर्सलाई आईपीएलको उपाधि दिलाएका थिए । तर उनले कोलकाताको सफलतालाई निरन्तरता दिन सकेनन् । उनले दिल्ली आउनुअघि कोलकातालाई जस्तै च्याम्पियन बनाउने बाचा गरेका थिए ।
अहिलेसम्म दिल्लीले खेलेका ६ खेलमा दिल्ली डेयरडेभिल्सले ५ खेलमा हारको सामना गरेको छ । यो सिजन दिल्लीका लागि गम्भीरको प्रदर्शन राम्रो रहेन ।
उनले पाँच पारीमा केवल ८५ रन बनाए । जसमा किङ्ग्स इलेभन पञ्जाबविरुद्ध ५५ रनको पारी पनि सामेल छ । उनले पछिल्ला पाँच पारीमा दोहोर अंक पनि जोड्न सकेनन् ।
यस साल जनवरीमा आईपीएलका लागि खेलाडीको लिलामीमा दिल्लीको टीमले गम्भीरलाई २.८ करोड् भारतीय रुपैयाँमा किनेको थियो । कोलकाता नाइटराइडर्सले सन् २०१२ र २०१४ मा गम्भीरको कप्तानीमा आईपीएलको उपाधि जितेको थियो ।
प्रतिक्रिया दिनुहोस !
