धनगढी : काठमाडौँबाट धनगढीका लागि उडेको सौर्य एयरलाईन्सको जहाज शुक्रबार दिउँसो दुर्घटनाबाट जोगिएको छ । काठमाडौँबाट ११ बजेर ४० मिनेटमा ११ जना बालकसहित ५४ जना यात्रु बोकेर उडेको ९ एनएएमई कल साइनको जहाजमा धनगढी विमानस्थलदेखि २५ किलोमिटर टाढाको आकाशमा चरा ठोकिएको छ ।
धनगढी विमानस्थलका एयर ट्राफिक कन्ट्रोलर रवि यादवले जहाजको नोज (अगाडिको चुच्चो भाग) मा चरा ठोकिएको जानकारी दिए । झण्डै साढे ६ हजार फिटको उचाइमा रहेका बेला जहाजमा चरा ठोकिएको उनले बताए । कैलालीमा पर्ने घोडाघोडी नगरपालिकाको आकाशमा चरा ठोकिएको अनुमान गरिएको छ ।
जहाजमा चरा ठोकिएपछि जहाज धनगढी विमानस्थलमा सकुशल अवतरण भएको छ भने सबै यात्रु र ४ जना चालक दलका सदस्य सकुशल छन । जहाज राम्ररी अवतरण गरी पार्किडमा राखिएको धनगढी विमानस्थलले जनाएको छ ।
चरा ठोकिएपछि जहाज पार्किडमा राखिएको छ । काठमाडौँबाट इन्जिनियरको टोली आइरहेको सौर्य एयरलायन्सले जनाएको छ । जहाजमा खासै क्षति नभएपनि इन्जिनियरले उडाउन सकिने निर्क्यौल गरेपछि मात्रै उड्ने धनगढी विमानस्थलले जनाएको छ । श्री एयरको विमानमा काठमाडौँबाट इन्जिनियरको टोली धनगढी विमानस्थलमा आइरहेको छ ।
चरो ठोकिएपछि सौर्य एयरको जहाजमा काठमाडौँ जाने यात्रुलाई इन्जिनियरको टोली नआउँदासम्मका लागि विमानस्थलमै राखिएको छ । इन्जिनियरको टोली आएपछि मात्रै उडानको निश्चित हुने सौर्य एयरको धनगढी शाखाले जनाएको छ ।
प्रतिक्रिया दिनुहोस !
