गगन भन्छन्: सरकारमा नजाँदैमा कांग्रेसको हरिबिजोग हुँदैन, छाया सरकार चलाऔँ

चितवन: नेपाली कांग्रेसका युवा नेता गगनकुमार थापाले नेपालका सबै राजनीतिक उपलब्धि कांग्रेसले युद्ध जितेर हासिल गरेकाले एक पटक हार्दैमा फरक नपर्ने बताएका छन् । उनले अहिलेको निर्वाचनको लडाइँ मात्रै हारेकाले कार्यकर्तालाई निराश नहुन पनि आग्रह गरेका छन् । 

कांग्रेस चितवनले शुक्रबार गरेको संगठन सुदृढीकरण तथा पुनःजागरण अभियान कार्यक्रमको उद्घाटन गर्दै उनले यस्तो बताएका हुन् । 'पृथ्वीनारायण शाहले पनि नेपाल एकीकरण गर्दै गर्दा अनेकौं लडाइँ हारेका थिए', उनले भने, 'तर अन्तिममा युद्ध जितेरै छाडे । त्यसैले हामी निराश हुनुपर्दैन ।'

अबको पाँच वर्ष सरकारमा नगए पनि कांग्रेसलाई फरक नपर्ने उनले बताए । 'अब पाँच वर्ष काँग्रेस सरकारमा नरहँदा कुनै कार्यकर्ताको हरिबिजोक हुँदैन', उनले भने, 'हामी सबै आस्थाका कारणले कांग्रेसमा लागेका हौँ ।'

थापाले निर्वाचनमा जित र हार जे भए पनि जुन ठाउँमा निर्वाचन लडेको छ, त्यो ठाउँको छाया सरकारको रुपमा काम गर्नुपर्ने बताए ।