तानसेन : सरकारले यातायात तथा ढुवानी क्षेत्रमा आलोपालो प्रथा खारेज गरेपछि व्यवसायी चरणबद्ध आन्दोलनमा उत्रिएका छन् । यातायात व्यवसायीले गरेको आन्दोलनको कारण पाल्पा, गुल्मी, अर्घाखाँची, रुपन्देही, कपिलवस्तु, नवलपरासीलगायत प्रदेश ५ का विभिन्न जिल्लाको जनजीवन प्रभावित बनेको छ ।
यातायात व्यवसायीले सरकारविरुद्ध सवारीसाधनको ‘क्यु फ्री’ गर्दै यातायात काउन्टर बन्द गरेका छन् । वैशाख ५ गतेदेखि सवारीसाधनमा कालो झण्डा राखेर सांकेतिक विरोधमा उत्रिएका व्यवसायीले वैशाख १४ र १५ गते ‘क्यु फ्री’ गरी विरोध जनाएका हुन् ।
व्यवसायीले गरेको ‘क्यु फ्री’ आन्दोलनका कारण यात्रु मर्कामा परेका छन् । उनीहरू समयमा गन्तव्यमा पुग्न सकेका छैनन् । सरकारले गरेको निर्यणको विरोधमा यातायात व्यवसायीले आलोपालो नियमभन्दा आफूखुसी सवारी चलाइरहेका छन् । सवारीसाधन छुट्ने र पुग्ने समयको कुनै नियम नभई सवारीधनीले आफूखुसी सवारीसाधन चलाउन थालेका हुन् । सरकारले व्यवसायीका सवारीसाधनलाई आलोपालो प्रथा खारेज गर्दै सेवामूलक संस्थाका रूपमा सञ्चालनमा रहेका यातायात व्यवसायीलाई प्रालिको रूपमा दर्ता गर्ने नियम जारी गरेपछि व्यवसायीले अबौं लगानी जोखिममा परेको भन्दै आन्दोलनमा उत्रिएका हुन् ।
‘क्यु फ्री’का कारण सवारीसाधन आफूखुसी सञ्चालन हुने भएकाले कतिखेर कहाँबाट गाडी छुट्छ भन्ने अन्योलले यात्रु मारमा परेका हुन् । यातायात व्यवसायीले तराई क्षेत्रअन्तर्गत रुपन्देही, कपिलवस्तु, नवलपरासी, चितवन, दाङलगायत क्षेत्रमा टिकट काउन्टर बिहानदेखि १२ बजेसम्म बन्द रहे भने पहाडी क्षेत्र पाल्पा, गुल्मी, अर्घाखाँची, स्याङ्जालगायत जिल्लामा दिउँसो १२ बजेदेखि बन्द भए । काउन्टर बन्द भएपछि सवारी चालकले सवारी साधन थन्क्याएर आफूखुसी काममा निस्किएकाले यात्रुहरू अलपत्र परेका हुन् ।
सरकारले व्यावसायीको करोडौं लगानी ध्वस्त पार्ने गरी अस्वस्थ प्रतिस्पर्धा गराएको भन्दै यो नियम फिर्ता नलिएसम्म आन्दोलन जारी रहने राष्ट्रिय यातायात व्यवसायी महासंघ प्रदेश ५ संयोजक डिलबहादुर ढुंगानाले बताए । प्रदेश ५ मा सार्वजनिक यातायात क्षेत्रमा ३९ वटा समितिका पाँच हजारभन्दा बढी सवारीसाधनले सेवा दिँदै आएको संयोजक ढुंगानाले जानकारी दिए ।
प्रतिक्रिया दिनुहोस !
