कुस्मा : लामो समयदेखि विवादमा तानिएको पर्वत जलजला गाउँपालिकाको केन्द्र लामाखेतमा सारिएको छ । गाउँपालिका घोषणा सँगै वडा नं. ३ को वडा कार्यालयबाट सञ्चालन हुँदै आएकोमा सेवा शुक्रबारदेखि वडा नम्बर ४ मा पर्ने लामाखेतबाट सुरु भएको हो ।
गाउँ कार्यपालिकाको दुईतिहाइ बहुमतबाट गाउँसभाले गरेको निर्णय, संघीय सरकारको मन्त्रिपरिषद्को निर्णय र राजपत्रमा प्रकाशन भएको सूचनाअनुसार स्थायी केन्द्र लामाखेतमा कार्यालय स्थापना भएको हो । यसअघि वडा नं ३ मा पर्ने अस्थायी केन्द्र साविक माझफाँट गाविसको भवनबाट गाउँपालिकाको सेवा प्रवाह हँुदै आएको थियो ।
लामाखेतमा २ वटा घर भाडामा लिएर सेवा सञ्चालनमा ल्याइएको गाउँपालिकाका अध्यक्ष यामबहादुर मल्लले जानकारी दिए । लामो समयदेखिको विवाद र आन्दोलनपछि संघीय मामिला तथा स्थानीय विकास मन्त्रालयले लामाखेतमा सार्ने सहमति दिएपछि कार्यालय स्थानान्तरण भएको मल्लले बताए । वैशाख ९ गते गाउँपालिका अध्यक्ष मल्लको अध्यक्षतामा बसेको कार्यपालिका बैठकले सर्वसहमतिमा कार्यालय स्थानान्तरण गर्ने निर्णय गरेको थियो ।
बैठकले वडा नं. ४ का अध्यक्ष भीष्म मल्लको संयोजकत्वमा प्रमुख प्रशासकीय अधिकृत कृष्णप्रसाद गौतम र कार्यपालिका सदस्य माया शर्मा रिजाल सदस्य रहेको भवन तथा जग्गा व्यवस्थापन समिति गठन गरेको थियो । पहिलो गाउँसभामा दुई तिहाइ बहुमत सदस्यको समर्थनमा भएको निर्णय र गत फागुन तेस्रो साता राजपत्रमा प्रकाशित सूचनाअनुसार लामाखेतमा केन्द्र स्थापना गरिएको ८ नम्बर वडा नाङ्लिबाङका अध्यक्ष हरिविकास जिसीले जानकारी दिए ।
यसअघि तत्कालीन स्थानीय तहको संख्या, सिमाना र नामांकनका लागि बनेको आयोगले साविकका बाँसखर्क, माझफाँट, लेकफाँट, सालिजा, धाइरिङ, नाङ्लिबाङ र बनौ गाविसलाई समेटेर जलजलाको अस्थायी केन्द्र वडा न. ३ स्थित साविक माझफाँट गाविसलाई तोकेको थियो । यसअघि कार्यालय सञ्चालन हुँदै आएको माझफाँटको मल्लाजका बासिन्दाले कार्यालय स्थानान्तरणको विरोध गरेका छन् । उनीहरूले कार्यालयमा तालाबन्दी गरी कागजात र सामान नयाँ कार्यालयमा लैजान अवरोध गरेको स्थानीय लालबहादुर अधिकारीले जानकारी दिए ।
केन्द्र विवादसम्बन्धी मुद्दा सर्वोच्च अदालतमा विचाराधीन रहेको अवस्थामा सेवाग्राहीलाई बिनासूचना एक्कासि कार्यालय सारिएकाले तालाबन्दी गरिएको स्थानीय रवीन जिसीले बताए । कार्यालय स्थानान्तरण भएपछि अन्य वडावासी भने हर्षित छन् । अहिलेको स्थानमा सडकको पहुँच, फराकिलो जग्गा भएकाले बाह्रैमास सेवाग्राहीलाई कार्यालयमा आउन सजिलो हुने स्थानीय बताउँछन् ।
प्रतिक्रिया दिनुहोस !
