बालुवाबेंसी (कास्की) : कास्की र लमजुङको सिमानामा बग्ने रुदी खोलामा निर्माणाधीन रुदीखोला ‘ए’ जलविद्युत् आयोजनाको निर्माण तीव्र गतिमा अघि बढेको छ । ८.८ मेगावाट क्षमताको यस आयोजनाको समग्र निर्माण ९० प्रतिशत सकिएको आयोजनाले जनाएको छ ।
आयोजना प्रमुख सरोज भट्टराईका अनुसार बाँधस्थल निर्माण, हेडरेस पाइप राख्ने, पेनस्टक पाइप राख्ने, सर्ज ट्यांक निर्माण, पावरहाउस निर्माणलगायत निर्माणकार्य अन्तिम चरणमा पुगेको छ । भट्टराईका अनुसार कास्कीको मिजुरे र लमजुङको सिङ्दीबेसी सीमामा बाँधस्थलको इन्टेक, वयर, बाँध सुरक्षा पर्खाल, कल्भर्ट (नहर) निर्माणको काम सकिएको छ ।
बाँधस्थलमा पानी जम्मा गर्ने पोखरी खन्ने, हेडरेस पाइप राख्ने ठाउँ खन्ने काम सकिएको छ । पाइप बिछ्याउने, पेनस्टक पाइप राख्ने, सर्जट्यांक खन्ने गरी समग्रमा ९० प्रतिशत निर्माण सकिएको भट्टराईले बताए ।
कास्कीको मिजुरेस्थित बालुवाबेंसीमा निर्माण भइरहेको पावरहाउसको काम पनि सकिएको छ । पावरहाउसमा ‘सिभिल स्टक्चर’ को काम सकिएको छ । ‘पावर हाउसमा मेसिन जडानको काम अन्तिम चरणमा पुगेको छ । टर्बाइन जोडिएको छ’, आयोजनाका सिभिल इन्जिनियर विपिन पाण्डेले भने, ‘७ जुनमा विद्युत् उत्पादन गर्ने गरी काम गरिरहेका छौँ ।’ पाण्डेका अनुसार ७ जुनमा पेन स्टकबाट पानी हालेर टर्बाइनको ‘टेस्टिङ’ गर्ने लक्ष्यका साथ काम भइरहेको छ ।
३१ मार्च २०१६ बाट निर्माण सुरु भएको यो आयोजनाबाट १५ सेप्टेम्बर २०१७ मा विद्युत् उत्पादन गर्ने लक्ष्य लिइएको थियो । तर, भूकम्प, नाकाबन्दी र बाढी पहिरोका कारण निर्माणमा केही समय ढिलाइ भएको आयोजनाले जनाएको छ । गत असारमा आएको बाढीले क्षति पुर्याउँदा निर्माणमा ढिलाइ भएको आयोजनाले जनाएको छ ।
८.८ मेगावाट आयोजनाको निर्माण ९० प्रतिशत सकिएको छ ।
बिन्ध्यवासिनी हाइड्रोपावर डेभलपमेन्ट प्रालि प्रवद्र्धक रहेको आयोजना निर्माणका लागि सिभिलतर्फ हाई हिमालय हाइड्रो कन्सट्रक्सन प्रालि, हाइड्रो मेकानिकलमा नर्थ हाइड्रो एन्ड इन्जिनियरिङ र इलेक्ट्रोनिक्समा टीपीएस इन्डिया प्रालिले काम गरेका छन् ।
लमजुङको पसगाउँस्थित सिङ्दीबेंसीमा बाँध बाँधेर कास्कीको मिजुरे रबैडाँडा हुँदै ६ किलोमिटरको पेनस्टक मेटल पाइपमार्फत पानी लगेर बालुवाबेंसीस्थित विद्युतगृहबाट विद्युत उत्पादन गरिने छ । सो आयोजनामा रुदीसहित छेदुवा खोलाको पानीसमेत मिसाइने छ । ३ सय मिटर ग्रेस हेड रहेको यो आयोजनाबाट उत्पादित विद्युत् कास्कीको मुग्रेबेसीस्थित ३३ केभीएको ट्रान्समिसन लाइनमा जडान गरिने मेकानिकल ओभरसियर कृष्णप्रसाद पण्डितले बताए ।
आयोजना निर्माणका लागि अनुमानित लागत १ अर्ब ३६ करोड २० लाख रुपैयाँ रहे पनि बाढीपहिरोको क्षति, मूल्यवृद्धि आदि कारणले बढ्न सक्ने बताइएको छ । यसमा सानिमा बैंकको नेतृत्वमा ७० प्रतिशत र प्रवद्र्धकको तर्फबाट ३० प्रतिशत लगानी जुटाइएको छ ।
२०६९ माघ २८ मा विद्युत् प्राधिकरणसँग विद्युत् खरिद सम्झौता (पीपीए) भएको आयोजनाको हिउँदमा ८.४० पैसा र वर्षामा ४.८० रुपैयाँ दररेट रहेको छ । बिन्ध्यवासिनीले रुदीखोला ‘ए’ सँगै रुदीखोला ‘बी’ को पनि निर्माण गरिरहेको छ । रुदी ‘बी’ को ३० प्रतिशत काम सकिएको आयोजनाले जनाएको छ ।
प्रतिक्रिया दिनुहोस !
