गौर : रौतहटमा अनुमतिबिना नै निजी विद्यालय सञ्चालन भइरहेका छन् । यस्ता विद्यालयले महँगो शुल्क लिएर विद्यार्थी भर्नासमेत सुरु गरेका छन् ।गौर नगरपालिका क्षेत्रमा यो वर्ष मात्र दर्जनभन्दा बढी दर्ता नभएका निजी विद्यालय खुलेको जनाइएको छ । कतिपय विद्यालयले अनुमति नै नपाएको माथिल्ला कक्षामा धमाधम विद्यार्थी भर्ना लिइरहेका छन् ।
अभिभावकलाई फकाएर छोराछोरी भर्ना गराउने तर विद्यालय भने दर्ता नै नहुने हुँदा ठगिने गरेको गौर-३ का विनोद पटेलले बताए । यहाँका सगरमाथा बोर्डिङ र न्यू होप बोर्डिङ स्कुलले कक्षा १ सम्मको मात्र अनुमति पाए पनि ८ सम्म कक्षा सञ्चालन गरिरहेका छन् । ग्यालेक्सी, रौतहट बाल एकेडेमी, लक्की, न्यू गोरेटो बोर्डिङ स्कुलले पनि नर्सरीदेखि ८ र १० कक्षासम्मको भर्ना खुलेको सूचना निकालेका छन् ।
शिक्षा ऐनअनुसार नयाँ विद्यालयले पहिलो वर्ष कक्षा १ को मात्र अनुमति पाउने र त्यसपछि प्रत्येक वर्ष मापदण्डअनुसार तह थप गर्दै जाने प्रावधान छ । दर्ताबिनाका निजी विद्यालयले अभिभावकलाई ठगिरहेको गुनासो बढेपछि गौर नगरपालिका कार्यालयले ठग्ने काम तत्काल बन्द गर्न पत्राचार गरेको छ । शिक्षा नियमावलीविपरीत अवैध ढंगबाट सञ्चालनमा रहेका विद्यालयलाई तत्काल कारबाही गरिने गौरका मेयर अजय गुप्ताले बताए ।
‘नगरपालिकाको शिक्षा ऐन राजपत्रमा प्रकाशन गर्दै छौं’, मेयर गुप्ताले भने, ‘दर्ता नभएका विद्यालय र अनुमति नपाएको कक्षा सञ्चालन गरेको पाइए कारबाही गर्छैां ।’
नगरपालिकाका शिक्षा शाखा प्रमुख नन्दकिशोर गुप्ताले निजी विद्यालयको अनुगमन भइरहेको जानकारी दिँदै दर्ताबिना नै विद्यालय खोलिएको पाइएको सुनाए । यस्ता विद्यालयले कक्षा ८ र १० का विद्यार्थीलाई सरकारीबाट परीक्षा दिलाउने गरेको पाइएको छ ।
न्यू होपका प्रिन्सिपल भैरव यादवले आफ्नो विद्यालय ‘प्रि-प्राइमरी’ तहसम्म दर्ता रहेको स्वीकार गर्दै माथिल्ला कक्षा भने कोचिङका रूपमा सञ्चालन गरेको बताए । ‘धेरैले अनुमति नै नलिई १० वर्षदेखि माथिल्ला कक्षा सञ्चालन गर्दै आएका छन्’, प्रिन्सिपल यादवले भने, ‘नियम सबैले माने हामी पनि मान्छौं ।’
जिल्लामा बिनादर्ताका १ सय निजी विद्यालय सञ्चालनमा रहेको जनाइएको छ ।
प्याब्सन रौतहटले यस्ता विद्यालयलाई कारबाही गर्न माग गरेको छ । तल्ला तहको मात्र अनुमति लिएर माथिल्ला कक्षा सञ्चालन गर्ने विद्यालयलाई कक्षा बन्द गर्न आग्रह गरिएको प्याब्सन रौतहटका सचिव गौतम श्रेष्ठले जानकारी दिए । जिल्लामा करिब ५० वटा मात्र निजी विद्यालयले अनुमति लिएर कक्षा सञ्चालन गरेका छन् ।
प्रतिक्रिया दिनुहोस !
