बेसीसहर : लोक गायिका तथा मोडल सुनिता अधिकारीको नयाँ लोकदोहोरी गीत 'पानको मिसी...' बजारमा आएको छ। सुनिताको यो सातौँ गीत हो।
उक्त गीतमा सुनिता र भगीरथ चलाउनेको स्वर रहेको छ। म्युजिक भीडीयोमा माया प्रेमका कुरालाई समावेश गरिएको छ। म्युजिक नेपाल र तिर्सना म्युजिक प्रालिले भीडीयो बजारमा ल्याएको छ। भीडीयोमा सुनितासँगै रामजी खाँडको बेजोड अभिनय रहेको छ।
आइतबार साँझ युटूबमार्फत रिलिज भएको हो। रिलिज भएको छोटो समयमै ३३ हजारभन्दा बढी दर्शकले यस म्युजिक भीडीयो हेरिसकेका छन्, सुनिता भन्छिन्, ' धेरै दर्शकको माया पाएकी छु, यो गीत पनि लोकप्रिय हुने विश्वास लिएकी छु।'
प्रकाश भट्ट निर्देशित भीडीयो साइ भिजन प्रालिले निर्माण गरेको हो। राजेश घिमिरेले म्युजिक भीडीयो छायाँकन गरेका छन् भने विष्णु शर्माको सम्पादन रहेको छ।
लमजुङको धुसेनीमा जन्मिएकी सुनिताले स्कुले जीवनदेखि नै गीत गाउन थालेकी हुन्। २०६४ सालमा एसएलसी पास गरेपछि व्यावसायिक गायिका बन्न उनी राजधानी काठमाडौँ पुगेकी हुन्। उनका ७ वटा गीत बजारमा आइसकेका छन्।
'दर्शक र स्रोतामाझ अझै लोकप्रिय गीत पस्कने चाहना छ', सुनिता भन्छिन्, 'लोकसंगीत नेपालको गहना हो, यसलाई जोगाउने हामी सबैको कर्तव्य हो।' सुनिताले मेरो लमजुङ घर, चौबन्दीको तुना, झलमल झलमललगायतका गीतहरुमा स्वर दिइसकेकी छन्।उनी छोटो समयमै लोकगीत क्षेत्रमा सफल गायिकामा पर्छिन।
प्रतिक्रिया दिनुहोस !
