महादेववेशी (धादिङ) : पृथ्वी राजमार्गअन्तर्गत धादिङको थाक्रे गाउँपालिका-२ महादेवबेसीमा चारवटा सवारी ठोक्किदा आगलागी भएको छ।घटनामा दुईजना सामान्य घाइते भएका छन्।
मुग्लिनबाट काठमाडौँतर्फ जाँदै गरेको ना ६ ख २७८१ नम्बरको सिमेन्ट बोकेको ट्रकमा बा ७५ प ६०५१ नम्बरको मोटरसाइकल ठोक्किएको थियो। मोटरसाइकलाई जोगाउने क्रममा सिमेन्ट बोकेको ट्रक गजुरीतर्फ आउँदै गरेको बा २ ग २४६३ नम्बरको नेपाली सेनाको ट्रकमा ठक्कर खाएर दुर्घटना भएको प्रहरीले जनाएको छ।जुधेकै ट्रकमा धादिङबेसीबाट काठमाडौँ जाँदै गरेको बा ३६ प ४२३९ नम्बरको मोटरसाइकल ट्रकमा ठोक्किन पुगेको थियो।
४ वटा सवारी साधन ठोक्किदा सिमेन्ट बोकेको ट्रकमा आगलागी भएको महादेवबेसी प्रहरीले जनाएको छ। आगलागीबाट ना ६ ख २७८१ नम्बरको ट्रक र बा ७५ प ६०५१ नम्बरको मोटरसाइकल जलेको छ। आगलागी कसरी भयो भन्ने विषयमा अनुसन्धान भइरहेको जिल्ला ट्राफिक प्रहरी कार्यालय गजुरीले जनाएको छ। दुर्घटनामा मोटरसाइकलमा सवार दुईजना घाइते भएका छन्।
घटनापछि साढे २ घण्टा पृथ्वी राजमार्ग अवरुद्ध भएको थियो। नेपाली सेना, नेपाल प्रहरी, स्थानीय बासी र सदरमुकामबाट गएको नीलकण्ठ नगरपालिकाको दमकलले आगो नियन्त्रणमा लिएर राजमार्गलाइ एकतर्फी रुपमा सूचारु गराएको छ।
प्रतिक्रिया दिनुहोस !
