ढाकामा साहित्यिक कार्यक्रम

काठमाडौं :  नेपाल स्रष्टा समाजको  टोलीले बंगलादेशको ढाकामा साहित्यिक तथा सांस्कृतिक कार्यक्रम गरेको छ । बंगलादेश–नेपाल फ्रेण्डसीप सोसाइटीको निमन्त्रणमा पुगेको १० नेपाली स्रष्टासँग बंगलादेशी साहित्य र संस्कृतिबारेमा अन्तक्रिया कार्यक्रम गरेको हो । 

बंगलादेशका उपसभामुख फैजल रब्बी मियाको प्रमुख आतिथ्यता तथा बंगलादेशका लागि नेपाली राजदूत प्रा. डा. चोपलाल भुसालको विशेष आतिथ्यतामा शुक्रबार ढाकामा कार्यक्रमको आयोजना गरिएको थियो । कार्यक्रममा बंगलादेशका कविहरु मोहम्मद नुराल हुडा, हबिबुल्लाह सेराजी, प्रा. डा. दिलारा हाफिस, रविउल हुसेन, मुस्तफा मजिद, अफ्रुजा सुल्ताना तथा नेपालका साहित्यकारहरु नगेन्द्रराज शर्मा, मञ्जुुल, प्रा. डा. कुसुमाकर न्यौपाने, सुस्मिता नेपाल, पुष्पा खनाल, मोहन चापागाई, नवराज पुडासैनी तथा सरस्वती शर्मा जिज्ञासु र नेपाली दूतावासका उप–प्रमुख धनबहादुर ओलीले रचनाहरु वाचन गरेका थिए ।

साहित्य र संस्कृतिको आदानप्रदानमार्फत् नेपाल र बंगलादेशबीच रहेको साहित्यिक, सांस्कृतिक सम्बन्धलाई अझ मजवुद बनाउन कार्यक्रमको आयोजना गरिएको समाजका अध्यक्ष पवन आलोकले बताए । नेपाल र बंगलादेशका यी दुई संस्थाबीच दशक लामो साहित्यिक, सांस्कृतिक सम्बन्ध रहिआएको छ । उनले दुई देशका जनताबीचको न्यानोपनका कारण नेपाल स्रष्टा समाजको स्थापना अघिदेखि नै बंगलादेशका साहित्यिक संस्थाहरुसँग गाढा सम्बन्ध बनिसकेको स्मरण गरे । एक अर्काका विचार, भावना र अनुभवको आदानप्रदान गर्दै यो सम्बन्धलाई अझ दीगो र फलदायी बनाउन यस्ता कार्यक्रमहरुले सहयोग गर्ने उनको भनाई छ ।

कार्यक्रममा समाजका कोषाध्यक्ष, गीतकार पुष्पा खनालको म्युजिक भिडियो “यो आँखाको पानीलाई” सार्वजनिक गरिएको थियो । प्रमुख अतिथि उपसभामुख मियाले सङ्गीत भनेको विश्वव्यापी भाषा भएको बताउँदै सार्वजनिक गरिएको म्युजिक भिडियोमार्फत् व्यक्त भावनाले आफ्नो मन छोएको बताए । उनले भने, ‘नेपाल र बंगलादेशबीचको वर्षौँदेखिको अटुटसम्बन्धको जगलाई दुई देशको साहित्य र संस्कृतिले बलियो बनाएको छ ।’

स्रष्टा खनालले कुनै जात, जाति, भाषा र धर्म तथा राजनीतिक, सामाजिक, सांस्कृतिक आस्थाभन्दा पर पनि एउटा सम्बन्ध हुने र त्यसलाई सङ्गीतले मात्र जोड्न सक्ने बताइन् । राजदूत भुसालले आफू राजदूत भएर बंगलादेश आउँदा कुनै अनौठो अनुभूति नभएको र यो आफ्नै दोस्रो घर जस्तो लागेको बताउँदै यो सबै भनेको दुईदेशबीचको सामाजिक, सांस्कृतिक समानता कारण भएको बताए । बीसौं वर्षअघिदेखि यहाँका मानिस र संस्कृतिसँग आफू जोडिएको भन्दै वरिष्ठ कवि मञ्जुलले बंगलादेशी साहित्यकार तथा यहाँका जनताहरु धेरै सहयोगी, मित्रवत् तथा हामीको भावना बोकेर हिँड्ने खालका भएको जानकारी दिए ।

शरीर, अभिव्यक्ति र कविताको बेग्लै भाषा हुने बताउँदै वरिष्ठ कवि, पत्रकार नगेन्द्रराज शर्माले सार्वजनिक गरिएको म्युजिक भिडियो तथा कार्यक्रममा वाचन गरिएका कविताहरु बेग्लै भाषाका भए पनि ती कुराहरु आपसमा बुझ्न कठिन नभएको अनुभव सुनाए । सोसाइटीका अध्यक्ष इम्दादुल हकले दुई देशको भाषा, साहित्य र संस्कृति यसरी नै निरन्तर आदानप्रदान गर्नुपर्नेमा जोड दिए । चारदिनको भ्रमणको क्रममा टोलीले ढाका विश्व विद्यालय, जहाँगिर विश्व विद्यालय, शहिद मिनार, बंगलादेशको संसद, राष्ट्रिय कवि काजी नजरुल इस्लामको समाधि, ढाकेश्वरी मन्दिर, केन्द्रीय शहिद स्मारकलगायतका महत्वपूर्ण स्थानहरुको अवलोकन भ्रमण गरेको थियो ।