काठमाडौं : वाम गठबन्धनबाहिर रहेका संघीय समाजवादी फोरम र नयाँ शक्तिसँग एमाले–माओवादीले बृहत् कार्यगत एकताका लागि छलफल थालेका छन् । प्रधानमन्त्री तथा एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहालले फोरम अध्यक्ष उपेन्द्र यादव र नयाँ शक्तिका संयोजक डा.बाबुराम भट्टराईसँग केही सातायता छुट्टाछुट्टै छलफल गरी बृहत् कार्यगत एकताका विषयमा छलफल चलाएका हुन् ।
ओली–दाहाल दुवैले यादव र डा.भट्टराईसँग एकताकै प्रक्रियामा सहभागी गराउँदै लैजान तत्काललाई बृहत् कार्यगत एकताको छलफल गर्ने समझदारीअनुसार नै छलफल भएको हो ।
शीर्ष नेताबीच केही सातायता पटक–पटक छलफल भइरहेको नयाँ शक्ति पार्टीका नेता गंगानारायण श्रेष्ठले खुलाए ।
बिहीबार पनि नेताहरूबीच छलफल भएको थियो । ‘चार दलका शीर्ष नेताबीच परिवर्तनका एजेन्डाका आधारमा कार्यगत एकता गर्ने गरी अनौपचारिक वार्ता भइरहेको छ’, नयाँ शक्तिका नेता श्रेष्ठले अन्नपूर्णसँग भने, ‘बिहीबार मात्रै पनि दुई पार्टीका नेताहरूबीच भेट भएको छ ।’
शीर्ष नेताबीच भइरहेका अनौपचारिक संवादका विवरण डा.भट्टराईले नयाँ शक्ति पार्टीमा शुक्रबार बिफ्रिङ गर्नेछन् ।
शुक्रबार नयाँ शक्तिले पार्टी सचिवालय बैठक बोलाएको छ । माओवादी केन्द्रका अध्यक्ष दाहालले पनि बुधबार केन्द्रीय नेताको अनौपचारिक बैठकमा नयाँ शक्ति र संघीय समाजवादी फोरमसँग बृहत् कार्यगत एकताका विषयमा छलफल भइरहेको बताएका थिए ।
‘उपेन्द्रजी सरकारमै पनि आउनुहुन्छ, भट्टराईजी अलमलमा जस्तो देखिनुहुन्छ, तर कार्यगत एकतामै आउनुपर्छ भन्नेमा देखिनुभएकोछ’, दाहालले बुधबार भनेका थिए, ‘उहाँहरू (उपेन्द्र र बाबुरामजी) लाई बृहत् कार्यगत एकतामा ल्याउन केही दिनयता ओलीजी र म दुवै छलफलमा छौं ।’
संघीय समाजवादीका वरिष्ठ नेता अशोक राईले पनि नेताहरूका बीचमा भेटघाट र छलफल हुने गरेको विषय अस्वाभाविक नभएको बताउँछन् । ‘नेताहरूबीच भेटघाट हुन्छ, हुनुपर्छ’, राईले भने, ‘यो नयाँ र अस्वाभाविक विषय होइन । एमाले र माओवादीसँग कुनै प्रकारको एलायन्स हुनका लागि उनीहरूले मधेसका मुद्दामा लिखित सहमति जनाउनुपर्छ ।’
डा.भट्टराईसँग कार्यगत एकतामा अझै आशंका रहे पनि यादव सरकारमा आउने कुरामा भने दाहाल ढुक्क छन् । समाजवादी फोमरका अध्यक्ष यादवले पनि आफ्नो पार्टीको जारी केन्द्रीय समितिको बैठकमा वर्तमान सरकारमा सहभागी हुने विषयमा आफूहरू तयार रहेको बताएका छन् ।
‘एमाले संविधान संशोधन एजेन्डामा लिखित सम्झौता गर्न अनिच्छुक देखिएको छ’, यादवको भनाइ उद्धृृत गर्दै फोरमका एक नेताले भने, ‘संविधान संशोधनबिना सरकारमा सहभागिता हुने कुरा करिबकरिब अहिलेलार्ई टुंगिएको छ ।’
प्रतिक्रिया दिनुहोस !
