यातायात व्यवसायी महासंघका महासचिव सरोज सिटौला पक्राउ
काठमाडौँ: नेपाल यातायात व्यवसायी राष्ट्रिय महासंघका महासचिव सरोज सिटौलालाई प्रहरीले पक्राउ गरेको छ।
सिटौलालाई भृकुटीमण्डपबाट प्रहरीले पक्राउ गरेर हिरासतमा लिएको हो । सादा पोशाकमा आएका प्रहरीले सिटौलालाई पक्राउ गरेर महानगरिय प्रहरी परिसर टेकुको हिरासतमा राखेका हुन् ।
रिपोर्टर्स क्लबमा पत्रकार सम्मेलनका लागि जाँदै गरेको अवस्थामा प्रहरीले सिटौलालाई पक्राउ गरेको हो । गृहमन्त्री रामबहादुर थापाले यातायात अवरुद्ध गर्नेलाई कारबाही गर्ने निर्देशन दिएलगतै प्रहरीले यातायात समितिका पदाधिकारीलाई पक्राउ गर्न थालेको हो ।
प्रहरीले पश्चिम नेपाल बस व्यवसायी संघका महासचिव जीवन बन्जाडे र उपाध्यक्ष पदम गहालाई पक्राउ गरिसकेको जिल्ला प्रहरी कार्यालय रुपन्देहीका एसपी श्याम ज्ञवालीले बताए ।
गृहमन्त्रालयले जिल्ला प्रशासन कार्यालयहरुलाई परिपत्र जारी गर्दै व्यवसायीलाई ऐन अनुसार कारबाही अगाडि बढाउन पत्राचार गरेको थियो ।
प्रतिक्रिया दिनुहोस !
