गौशाल : औरही नगरपालिका–६ को उपभोक्ता समिति गठनमा भएको विवादले उग्र रुप लिएपछि एकजनाको मृत्यु भएको छ । जिल्ला प्रहरी कार्यालय महोत्तरीका एसपी कुवेर कडायतका अनुसार स्थानीय ५९ वर्षीय लालु दासको मृत्यु भएको हो । घटनामा संलग्न भएको आरोपमा सो ठाउँका ६० वर्षीय शिवशंकर दास र ३५ वर्षीय इन्द्रजित दासलाई प्रहरीले नियन्त्रणमा लिएको छ ।
मृतकको पोष्टमार्टम गरिएको छ । घटनाको अनुसन्धान थालिएको एसपी कडायतले जानकारी दिए । ‘बाटो बनाउने बिषयमा शुक्रबार राति ९ बजेतिर बैठक बसेकोे थियो’, एसपी कडायतले भने,‘एक अर्काबीच हात हालाहाल भयो । भागाभाग हुँदा लालु खसेका थिए, पछि उनको मृत्यु भयो ।’
आर्थिक बर्ष २०७४–०७५ को विकास बजेटबाट औरही नगरपालिकाकी उपमेयर रेणु झाको पहलमा बैरीयामा सडक निर्माणको लागि ६ लाख रकम विनियोजित भएको वडा ६ का वडा अध्यक्ष नरेश यादवले जानकारी दिए । ‘लडाई भएको मैले सुनेको छु । कसले कुट्यो, मा¥यो मलाई थाहा छैन’, वडा अध्यक्ष यादवले भने,‘उप–मेयरले म आफैले उपभोक्ता समिति गठन गर्छु भनेपछि हामीले छाँडिदियो ।’ राति बैठक गर्नु गलत भएको उनको भनाइ छ ।
उता औरही नगरपालिकाकी उप–मेयर रेणु झाका सहयोगीलेले भने उपभोक्ता समित गठन गर्न बैठक नबसेको दाबी गरेका छन् । ‘राति उपभोक्ता समिति गठन गर्न कुनै बैठक बसेको थिएन,’ उनले भने,‘घटना दुःख छ । यसको छानबिन हुनुपर्छ ।’
प्रतिक्रिया दिनुहोस !
