बालिका बलात्कारमा दुई पक्राउ

चन्द्रपुर : बालिकालाई बलात्कार गरेको अभियोगमा रौतहटको चन्द्रपुरबाट दुई जना युवक पक्राउ परेका छन्। सिन्धुलीको कमलामाई–६ की १३ वर्षीया बालिकालाई बलात्कार गरेको अभियोगमा प्रहरीले सर्लाही हरिवन–११ का २६ वर्षीय मुकेश दास र २६ वर्षीय रिजवान अन्सारीलाई पक्राउ गरेको हो।

उनीहरूले वैशाख २० गते राति बलात्कार गरेको उजुरी पीडितकी आमाले इलाका प्रहरी कार्यालय चन्द्रनिगाहपुरमा दिएकी छन्। उक्त दिन बालिका सिन्धुलीबाट हरिवन बजारस्थित दिदीको घरमा आएको र साँझ फर्कने क्रममा बसपार्कमा भेटेर घर पु¥याइदिने भन्दै रौतहट ल्याएर बलात्कार गरेको पीडितको भनाइ छ।

अभियुक्तले बा.२५प १३७८ नम्बरको मोटरसाइकलमा राखेर चन्द्रपुर–२ स्थित सहिद स्मृति पार्कभित्र लगेर दासले बलात्कार गरेको पीडितले बताएकी छन्। चन्द्रपुर ल्याएपछि मोबाइललगायत सामान किनिदिने भन्दै फकाएर पार्कभित्र जबर्जस्ती गरेको किशोरीले प्रहरीसमक्ष बताएकी छन्।

बालिकालाई बलात्कार गरिरहेको सूचना पाएपछि राति २ बजे दास र अन्सारीलाई पक्राउ गरिएको इलाका प्रहरी कार्यालय चन्द्रनिगाहपुरका डीएसपी शान्तिराज कोइरालाले जनाकारी दिएका छन्। उनका अनुसार बालिकाको स्वास्थ्य परीक्षण गराई घटनाको अनुसन्धान भइरहेको छ।