गृहमन्त्रीको मदिरा नियन्त्रण अभियानमा युवा र विद्यार्थीको साथ
काठमाडौं : गृहमन्त्रालयले सुरु गर्न लागेको ‘लागुपदार्थ निषेध र मदिरा नियन्त्रण’ अभियानमा युवा र विद्यार्थीले साथ दिने भएका छन् ।
मंगलबार गृहमन्त्रालयमा गृहमन्त्री रामबहादुर थापा ‘बादल’को उपस्थितिमा नेकपा (एमाले), नेपाली कांग्रेस, नेकपा (माओवादी केन्द्र), संघीय समाजवादी फोरम र राष्ट्रिय जनता पार्टी आवद्ध विद्यार्थी संगठन र युवा संगठनका प्रतिनिधिसहितको छलफलमा विद्यार्थी र युवा नेताले यस्तो प्रतिवद्धता व्यक्त गरेका हुन् ।
पाँच पार्टी निकट विद्यार्थी संगठन, युवा संगठनका साथै जनजाति विद्यार्थी महासंघ र जनजाति युवा संघका प्रतिनिधिले पनि छलफलपछि अभियानमा आफू र आफ्नो संगठनको तर्फबाट साथ र सहयोग हुने प्रतिवद्धतापत्रमा हस्ताक्षर गरेका छन् ।
कार्यक्रममा गृहमन्त्री थापाले केहीदिनमै मन्त्रालयले केन्द्रमा काठमाडौँबाट र स्थानीय तहमा देशभरका वडाबाट एकैसाथ ‘लागुपदार्थ निषेध र मदिरा नियन्त्रण’ अभियान सुरु गर्न लागेको जानकारी दिँदै त्यसमा साथ दिन आग्रह गरे । प्रत्येक वडामा युवा, विद्यार्थी, मजदुर, महिला, नागरिक समाज र सुरक्षाकर्मी सहितको ‘लागुपदार्थ निषेध र मदिरा नियन्त्रण’ समिति गठनको तयारी रहेको बादलले जानकार िदिए ।
तत्कालै मदिरा निषेध सम्भव नभए पनि निश्चित उमेरका व्यक्तिले निश्चित समय र स्थानमामात्रै मदिराको प्रयोग र विक्रीवितरण गर्न पाउने गरी योजना ल्याईने गृहमन्त्रीको भनाइ छ । छलफलमा गृहसचिव प्रेमकुमार राईले लागुऔषध र मदिराबारे बृहत जनचेतानमुलक कार्यक्रम ल्याइने बताए । कार्यक्रममा गृहमन्त्री थापा, गृहसचिव राईसहित गृहमन्त्रीका सल्लाहकार सूर्यप्रकाश सुवेदी, नेपाल प्रहरीका महानिरीक्षक सर्वेन्द्र खनाल, सशस्त्र प्रहरी बलका महानिरीक्षक शैलेन्द्र खनाल, राष्ट्रिय अनुसन्धान विभागका प्रमुख दिलिपराज रेग्मी लगायतको उपस्थिति थियो ।
प्रतिक्रिया दिनुहोस !
