उपलब्धिले मनायो आख्यान दिवस, गीता केशरी सम्मानित
काठमाडौं: उपलब्धि बहुउद्देश्यीय सहकारी संस्थाले छैटौं उपलब्धि आख्यान दिवस मंगलबार मनाएको छ । २०७० सालदेखि निरन्तर मनाउँदै आइरहेको आख्यान दिवसका अवसरमा उपलब्धि बहुउद्देश्यीय सहकारी संस्थाले ‘उपलब्धि आख्यान दिवस २०७५’ बाट साहित्यकार गीता केशरीलाई सम्मान गरेको छ ।
संस्थाले विगत छ वर्षदेखि हरेक वैशाख २५ गते आख्यान दिवस मनाउँदै आएपनि पहिलोपटक साहित्यकार केशरीलाई सम्मान गरेको हो । साहित्यकार केशरीका उपन्यास, कथा संग्रहलगायत आख्यान सम्बन्धी दर्जनौं पुस्तक प्रकाशित छन् । केशरीका ‘नयाँ अध्याय’, ‘खुला आकाश’, ‘अन्तिम विन्दु’, ‘खोज’, ‘मुक्ति’ सौगात लगायत दर्जन बढी उपन्यास प्रकाशित छन् ।
कार्यक्रममा बोल्दै पूर्व मन्त्री शंकर कोइरालाले सहकारीले साहित्यको योगदानमा रचनात्मक भूमिका खेल्न सक्ने बताए । नेपालमा उपन्यासले बढी चर्चा पाइरहेको भन्दै उनले उपन्यासलाई गतिशील र जीवन्त बनाउन साहित्यकार पछि हट्नु नहुने बताए ।
उपलब्धिले मात्र नभई राज्यले नै आख्यान दिवस मनाउनुपर्नेमा उनको जोड थियो । ‘उपलब्धि सहकारीले साहित्यिक क्षेत्रमा रचनात्मक योगदान दिएको छ, यसले अझै योगदान बढाउन सकोस्’ उनले भने । आर्थिक कारोबारसँगै साहित्यको योगदानमा भूमिका खेलेकोमा उनले उपलब्धिको प्रशंसा समेत गरे ।
अहिले बजेट निर्माणको क्रममा रहेकाले सरकारले साहित्यलाई समेत सम्मान दिन सक्नुपर्ने बताए । साहित्यले समाजको यथार्थ चित्रण गर्ने भएकाले सरकारले साहित्य र साहित्यकारको वृत्तिविकासमा ध्यान दिनुपर्ने उनको भनाइ थियो ।
कार्यक्रममा सम्मानित व्यक्तित्व साहित्यकार गीता केशरीले साहित्यले मान्छेको सोचमा पनि परिवर्तन ल्याउने बताइन् । सहकारीले साहित्यलाई पहिलो प्राथमिकता दिनुपर्ने उनको भनाइ थियो । अध्ययन, मनोरञ्जनका साथै आख्यानले देश विकासको बाटो देखाउन सक्नुपर्नेमा उनले जोड दिइन् ।
कार्यक्रममा बोल्दै वरिष्ठ साहित्यकार एवम् पत्रकार पुरुषोत्तम दाहालले साहित्य र पत्रकारिताको संयोजनबाट समाज बदलिने बताए । ‘साहित्य र पत्रकारिता एकअर्काका अभिन्न अंग हुन्’ उनले भने ।
नेपाल व्यापार संघका महासचिव कृष्णप्रसाद अधिकारीले आख्यान दिवस उपलब्धि सहकारीले मात्रै नभई राज्यलगायत सबैले मनाउन आवश्यक भएको बताए ।
कार्यक्रममा साहित्यकार जीवन श्रेष्ठ र खेम दाहालले आख्यान सम्बन्धी कार्यपत्र प्रस्तुत गरेका थिए । उपलब्धि संस्थाका अध्यक्ष देवराज शर्माको अध्यक्षतामा सम्पन्न कार्यक्रमको सञ्चालन विपिन शर्माले र स्वागत संस्थाका साहित्य विकास उपसमिति संयोजक रोशन थापाले गरेका थिए ।
प्रतिक्रिया दिनुहोस !
