खोलामा तैरिरहेको अवस्थामा बालकको शव भेटियो

गौशाला : महोत्तरी जिल्लाको एकडारा गाउँपालिकामा अवस्थित रातु खोलामा तैरिरहेको अवस्थामा बिहीबार बिहान एक बालकको शव फेला परेको छ। जिल्ला प्रहरी कार्यालय, महोत्तरीका प्रहरी उपरीक्षक कुबेर कडायतका अनुसार एकडारा गाउँपालिका–६ बगेया बस्ने किरित दासका छोरा अन्दाजी ९ वर्षीय रोशन दासको शव आज बिहान रातु खोलामा तैरिरहेको अवस्थामा भेटिएको हो । 

परिवारजनका अनुसार बुधबार साँझ तीनजना साथीसँग नदीमा नुहाउन गएका बालक दास सोही खोलाले बगाएर बेपत्ता भएका थिए। खोलाले बगाएर बेपत्ता भएका बालकलाई आफन्त, प्रहरी, नेपाली सेनालगायतले रातभर नदी छेउछाउ खोजेपनि उनी फेला परेका थिएनन् । 

तर बिहीबार बिहान भने उनी बेपत्ता भएकै स्थानमा पानीमाथि तैरिरहेको अवस्थामा फेला परेका हुन्। रासस