बिख्यात पर्वतारोही बोयान पेट्रोभ बेपत्ता, उद्दार गर्न चीन जाँदै नेपाली टोली

काठमाडौँः बुल्गेरियाका विश्वविख्यात पर्वतारोही बोयान पेट्रोभ १० दिनदेखि बेपत्ता भएका छन् । तिब्बततर्फ रहेको ८०२७ मिटर अग्लो शिशापाङ्मा हिमाल चढ्ने क्रममा सात दिनदेखि बेपत्ता भएका पेट्रोभ बेपत्ता भएपछि प्रख्यात आरोहीको अवस्थालाई लिएर चिन्ता बढेको हो । 

८ हजार मिटर अग्ला १४ वटा हिमालको सफलतापूर्वक आरोहण गरिसकेका आफ्ना प्रख्यात आरोही बेपत्ता भएपछि उनको खोजीका लागि बुल्गेरियाले चीन सरकारलाई आग्रह गरेको छ । 

चीन सरकारले आफ्नो पक्षबाट पेट्रोभको खोजीका लागि हरसम्भव प्रयास भइरहेको जनाउँदै नेपालको समेत सहयोग लिने जानकारी दिएको छ । चिनियाँ विदेश मन्त्रालयका प्रवक्ता गन सुआङले चीन सरकारले हिमालयमा बेपत्ता पेट्रोभको उद्दारका लागि सकेसम्म सबै प्रयास जारी राखिएको जनाएका छन् ।

‘चीन सरकार बुल्गेरियाली पर्वतारोही बोयान पेट्रोभलाई बचाउने हरेक कुरामा ध्यान दिइरहेको छ’, उनले भनेका छन्, ‘हामी उनलाई खोजी गर्ने हरसम्भव प्रयास गर्दैछौँ ।’ चीनले बुल्गेरिया र छिमेकी नेपालको पनि समन्वय र सहयोगमा खोजी तीब्र बनाइएको जनाएको छ । 

गत ३ मेदेखि पेट्रोभ हिमालयबाट गायब भएका हुन् । ३ मेका दिन १४ वटा ८ हजार मिटर अग्ला हिमाल चुमिसकेका पेट्रोभ बेपत्ता भएपछि खोजीका लागि नेपाली टोलीसमेत चीनतर्फ जाने भएको छ । 

१० जना पर्वतारोहीको टोलीसहित शाशापाङ्गमा आरोहणका लागि हिँडेका पेट्रोभ ७५ सय मिटरको उचाईमा पुगेपछि बेपत्ता भएका थिए । पेट्रोभको खोजीका लागि खटिएको उद्दार टोलीले ६ मेका दिन उनी बेपत्ता भएको क्षेत्रबाट एउटा टेन्ट र स्लिपङ ब्याग भेट्टाएका थिए । तर खराब मौसमका कारण खोजी कार्य तत्कालका लागि चिनियाँ पक्षले रोकेको थियो । 

बोयान पेट्रोभका साथी राडोस्लाभा नेनोभाले साथीको खोजी गर्न अल्पानाइस्ट उद्दार अभियानका लागि आर्थिक संकलन अभियान थालिएको जानकारी दिए ।

फेसबुकमा नेनोभाले भनेका छन्, ‘मलाई थाहा छैन, यो कदम कति उचित छ । बोयानको बचाउका लागि मैले आर्थिक अभियान सुरु गरेँ । यसबीचमा बिमा कम्पनीहरुबाट पनि रकम फिर्ता गर्नुपर्नेछ तर यो प्रक्रिया केही लाग्नेछ, मलाई अहिले नै जरुरी छ । रकम संकलनका लागि पेपल पनि सेयर गर्दैछु, यो प्रभावकारी होला ।’

बुल्गेरियाका प्रधानमन्त्री बोय्को बोरिसोले पेट्रोभ हराएपछि मन्त्रिपरिषद्को बैठक बोलाएर उनको खोजीका लागि सारा शक्ति लगाउने बताएका छन् । 

‘हामी पेट्रोभका आफन्तसँग पुरा सम्पर्कमा छौँ । हामीले नेपाल र चीनका अधिकारीसँग पनि कुरा गरिरहेका छौँ’, उनले भनेका छन्, ‘नेपालबाट चीन जानका लागि चिनियाँ राजदूतमार्फत हेलिकोप्टरको रुट पनि मिलिसकेको छ । मलाई विश्वास छ पेट्रोभ जीवितै भेटिनेछन ।’ 

बुल्गेरियाका विदेश मन्त्री एक्टेरिना जाहारेइभाले पेट्रोभ हराएको स्थानमा खोजी र उद्दारका लागि उच्च हिमाली क्षेत्रमा उड्ने हेलिकोप्टर भेटिएको बताएका छन् । उनका अनुसार धेरै उचाईमा उड्ने हेलिकोप्टर भेटिएकाले पेट्रोभको खोजीका लागि त्यसतर्फ भोलि नै पठाइने पनि बताएका छन् । 

मन्त्री एक्टेरिनाले पेट्रोभको खोजीका लागि चीनले हिमालय क्षेत्रम ६ जनाको टोली पठाइसकेको पनि बताएका छन् । तर मौसम खराब भएका कारण उनीहरु अघि बढ्न सकेका छैनन् । मौसममा सुधार भएपछि उद्दार टोली चाँडै क्याम्प टु मा पुग्ने पनि विश्वास लिए । 

नेपालबाट जाँदै सिम्रिकका हेलिकोप्टर 

पेट्रोभको खोजीका लागि शुक्रबार काठमाडौँबाट तीनवटा हेलिकोप्टर चीनतर्फ जाने भएका छन् । स्रोतका अनुसार काठमाडौँस्थित उच्च हिमालीक्षेत्रमा लामो समयसम्म उद्दारमा जुट्न सक्ने सिम्रिक एयरका तीनवटा हेलिकोप्टर हिमालयको चिनियाँ मोहडातर्फ जान लागेका हुन् । क्याप्टेनहरु आनन्द थापा, सुरेन्द्र पौडेल र सिद्धार्थ गुरुङ नेतृत्वको उद्दार टोली शुक्रबार चीनतर्फ जान लागेको हो । 

यो टोलीले यसअघि पनि उच्च हिमाली भेगमा दुर्घटनामा परेका हिमआरोही र पदयात्रीको उद्दार गर्दै आएको छ । हेलिकोप्टरलाई काठमाडौँस्थित चिनियाँ दूतावासमार्फत उडान अनुमति आइसकेको छ ।