डडेलधुरा : सदरमुकाम अमरगढीमा रहेको खानेपानीको समस्या समधानका लागि साना सहरी खानेपानी योजनाले ३० करोडभन्दा बढीको लगानीमा खानेपानी योजना निर्माण सुरु गरेको छ । जिल्ला सदरमुकाममा वर्षौं पहिले निर्माण भएको खलंगा खानेपानीबाट वितरण भइरहेको पानी अपुग भएकाले समस्या हुन थालेपछि साना सहरी खानेपानी योजनाको काम सुरु गरिएको हो ।
नयाँ बन्ने योजनामा कम्तीमा १३ सय धाराबाट पानी वितरण गर्न सदरमुकाममा साना सहरी खानेपानी योजनाको काम थालिएको हो । पुरानो खानेपानीले अहिलेको जनसंख्यालाई पानी अपुग भएपश्चात् विकल्पको खोजी गरिएको खलंगा खानेपानी उपभोक्ता तथा सरसफाइ समितिका सचिव देवकी भट्टले जानकारी दिइन् । अब बन्ने योजना ३० करोड ६२ लाखको लागतमा निर्माण भइरहेको साना सहरी खानेपानी योजनाले जनाएको छ ।
१३ सय धारामा खानेपानी वितरण गर्ने योजना भए पनि उक्त योजनाबाट बढ्दो जनघनत्वलाई हेरी कम्तीमा १५ सयसम्म धारा थप्न सकिने खलंगा खानेपानी तथा सरसफाइ उपभोक्ता समितिले जनाएको छ । नगरपालिकासँगको सहकार्यमा खलंगा खानेपानी तथा सरसफाइ उपभोक्ता समितिले गरेको सर्वेका आधारमा खलंगा, बागबजार, तुफानडाँडा र कीर्तिपुर क्षेत्रमा १३ सय धारा आवश्यक पर्ने तथ्यांकले देखाएको छ ।
निमार्ण कार्य सुरु भएको १८ महिनामै काम सम्पन्न गर्ने गरी साना सहरी खानेपानी योजना निर्माण गरिन लागिएको हो ।
खानेपानी योजनाको मुहान सदरमुकाम खलंगाबाट १९ किलोमिटर पाँच सय मिटर टाढा अमरगढी २ मा रहेको छ । अमरगढी २ को मतरे, लामासैन र अनारबे भन्ने खोलाको मूलबाट पानी संकलन गरी योजना निर्माण भइरहेको खलंगा खानेपानी तथा सरसफाइ उपभोक्ता सचिव भट्टले जानकारी दिइन् ।
सदरमुकाम क्षेत्रको खलंगा, बागबजार, कीर्तिपुर, तुफानडाँडा क्षेत्रमा १३ सय घरधुरीले गर्मीयाममा मुहानमा पानीको मात्रा घट्दै जाने भएकाले खानेपानी अभाव सहँदै आएका छन् । सदुरमुकाममा पानीको आपूर्ति सहज भएपश्चात् जनसंख्या थपिने आयोजनाले जनाएको छ । सुक्खायाममा खानेपानी समस्या भोग्दै आएका स्थानीयले सहजै पानी उपभोग गर्न पाउने योजना निर्माण कम्पनीले जनाएको छ ।
सर्वेमा मात्र दुई महिना खर्चेको निर्माण कम्पनी कालिका कन्ट्रक्सनले अहिले इन्टेक निर्माणका लागि आवश्यक सामग्री जुटाइरहेको छ । खानेपानी वितरण केन्द्र खलंगामा ट्यांकी निर्माणको कार्य पनि जारी छ ।
प्रतिक्रिया दिनुहोस !
