क्यान्सर अस्पताल सकसमा
भक्तपुर ः स्वास्थ्य मन्त्रालयले विपन्न क्यान्सर बिरामीहरूको भुक्तानी नदिँदा अस्पताल सञ्चालन सकस भएको भक्तपुर क्यान्सर अस्पतालले जनाएको छ । अस्पतालले गएको मंसिरदेखि वैशाख २७ गतेसम्म १० करोड ३६ लाख रुपैयाँ स्वास्थ्य मन्त्रालयबाट गरिब तथा विपन्न क्यान्सर बिरामीहरूलाई दिइने एक लाख रुपैयाँको भुक्तानी पाउन बाँकी भएको जनाएको हो । अस्पताल व्यवस्थापन समितिका अध्यक्ष लोकेन्द्रकुमार श्रेष्ठले स्वास्थ्य मन्त्रालयले रकम भुक्तानी निकासा नगर्दा अस्पताल सञ्चालन गर्न धौधौ भएको गुनासो गरेका हुन् ।
अस्पतालले दस करोड रुपैयाँ ऋणको भार बोक्न नसक्ने उनको भनाइ थियो । उनले उक्त रकम चाँडै उपलब्ध नगराइए गरिब तथा विपन्न क्यान्सर बिरामीहरूको उपचार रोक्न अस्पताल बाध्य हुने चेतावनी दिए । ‘गएको मंसिरदेखि बैशाख २७ गतेसम्म एक हजार ३६ जना गरिब तथा विपन्न क्यान्सर बिरामीको भुक्तानी रोकिएको छ’, अध्यक्ष श्रेष्ठले भने, ‘पहिले एकदुई महिनामै भुक्तानी उपलब्ध हुन्थ्यो तर यसपटक ६ महिना बित्दा पनि भुक्तानी उपलब्ध गराइएको छैन ।’ अस्पताल अत्यावश्यकीय सेवाको लागि भएकोले ऋण लिएर दैनिकी चलाउँदै आएको अस्पतालका मेडिकल निर्देशक प्राडा ऋषिकेशनारायण श्रेष्ठ बताउँछन् ।
रकम चाँडै उपलब्ध नगराइए गरिब तथा विपन्न क्यान्सर बिरामीहरूको उपचार रोक्न अस्पताल बाध्य हुने चेतावनी दिए ।
‘अस्पतालले चिकित्सक, नर्स, प्राविधिक तथा कर्मचारीलाई तलब खुवाउनसमेत ऋण लिनुपर्ने अवस्था आएको छ’, उनले भने । अस्पतालले दैनिक १० देखि १५ जना गरिब तथा विपन्न क्यान्सर बिरामीको उपचार दिँदै आएको छ । ‘गैरनाफामूलक भक्तपुर क्यान्सर अस्पताल जस्तोलाई ऋण बोकेर बिरामीको सेवा गर्न कठिन छ’, मेडिकल निर्देशक प्राडा श्रेष्ठ भन्छन्, ‘ऋण बोकेरै सेवा कहिलेसम्म ? ’ अस्पताल आफैं ऋणमा सञ्चालन भइरहेकोले धेरैलाई भुक्तानी रोक्नु परिरहेको बताए । पछिल्लो समय अस्पतालमा उपचारमा आउने बिरामीको चाप बढेको बढ्यै छ । एकसय पचास शैय्याको उक्त अस्पतालमा शय्याको अपर्याप्ताले बिरामी फर्काउन बाध्य भएको मेडिकल निर्देशक श्रेष्ठ बताउँछन् । उनका अनुसार सन् २०१८ को जनवरीदेखि अप्रिलसम्म चार महिनाको अवधिमा पाँच हजार पाँच सय ७४ जना नयाँ बिरामी अस्पताल पुगेका छन् । अस्पताल पुगेका नयाँ बिरामीमध्ये एक हजार एकसय १५ जनामा क्यान्सर लागेको पुष्टि भएको मेडिकल श्रेष्ठले जानकारी दिए । त्यस्तै चार महिनामा १८ हजार ६ सय ९४ जना बिरामी फलो अपको लागि अस्पताल पुगेको उनले जानकारी दिए ।
प्रतिक्रिया दिनुहोस !
