मोदीसँग मुख्यमन्त्री राउतको गुनासो: राज्यले हेपेर गरिब र पीडित भयौँ

बिहारको बाढीप्रति पनि चिन्ता जनाए 

काठमाडौँ: प्रदेश नम्बर २ का मुख्यमन्त्री लालबाबु राउतले नेपाल सरकारले हेपेर आफूहरु गरिब भएको गुनासो भारतीय प्रधानमन्त्री नरेन्द्र मोदीसँग गरेका छन् । 

जनकपुरमा मोदीको नागरिक अभिनन्दन कार्यक्रमलाई लिखित सम्बोधन गर्दै राउतले देशको सार्वभौमसत्ता र राष्ट्रिय अखण्डतालाई समेत बिर्सिँदै आफूहरु गरिब र पीडित भएको भन्दै गुनासो पोखेका हुन् । 

उनले लिखित वक्तव्यमा राज्यले मधेसी जनताप्रति विभेदकारी नीति, पूर्वाग्रह र विद्वेषपूर्ण व्यवहार गरेका कारण मधेसका जनता अत्यधिक गरिबी, बेरोजगारी, अभाव, शोषित र उत्पीडित जीवन जीउन विवश भएको भन्दै मोदीसँग गुहार मागेका छन् ।
 
विकासको मामिलाम मधेस पछि परेको उल्लेख गर्दै मुख्यमन्त्री रावतले भनेका छन्, 'विभेदकारी संविधान र प्रादेशिक अधिकारको लागि हाम्रो संघर्ष जारी छ ।'

उनले राज्य हरेका क्षेत्रमा क्षमता र योग्यताका आधारमा जुनसुकै जाति, वर्ग र समुदायका जनतालाई योग्यता क्षमताको आधारमा अवसर मिल्नु पर्ने पनि बताएका छन् । 

'हामी नेपालकै अभिन्न अंग हौँ, तर हामी चाहन्छौँ, हाम्रो देशमा पनि भेदभावबिना जुनसुकै जाति, वर्ग र समुदायका जनतालाई अवसर मिलोस', उनले भनेका छन्, 'जबकि तपाईँ एउटा समान्य परिवारको व्यक्ति आज भारतको सर्वोच्च कार्यकारी पदमा बिराजमान हुनुहुन्छ ।'

उनले कृषि क्षेत्रमा प्रदेश २ ले क्रान्ति गर्न चाहेको बताउँदै सहयोग गर्न पनि मोदीसँग अपिल गरको छन् । राउतले नेपाल-भारत सीमाक्षेत्र नेपाली भूभाग डुबेको भन्दा बढी चिन्ता विहारको गरेका छन् । 

'बाढीका कारण प्रदेश २ मात्र होइन, विहारको विभिन्न भूभागमा जनमालमा भारी नोक्सान भइरहेको छ', उनले भनेका छन्, 'प्रदेश २ का कोशी, कमला, बागमती, रातो बिगही, खाँडो र बलानको उचित व्यवस्थ गर्न सकेमा नेपाल र भारत दुवै क्षेत्रमा बाढी समस्या समाधान हुने आशा प्रकट गरको छन् ।'