पहिरोले भासियो रसुवाको त्रिदेशीय मार्ग, सयौँ सवारी रोकिए
वैशाख ३०, २०७५ आइतबार १७:४४:०
नुवाकोटः नेपाल–चीन प्रवेशका लागि हाल सन्चालनमा रहेको एकमात्र रसुवागढी नाका जाने त्रिशूली–धुन्चे–रसुवागढी मार्गमा पहिरो गएको छ । नेपाल–चीन र भारत त्रिदेशीय मार्गका रुपमा रहेको आइतवार दिउँसोदेखि स्याफ्रुबेंसी नजिकै पहिरो जाँदा सयौं सवारीसाधन रोकिन पुगेका छन् ।
गोसाइकुण्ड गाउँपालिका–६ स्याफ्रुबेंसी नजिकै सडक माथिबाट सुख्खा पहिरो झर्दा आवतजावत वन्द भएको जिल्ला प्रहरी कार्यालय रसुवाले जनाएको छ ।
रसुवागढी नाका जाने त्यस स्थानमा गएको पहिरो हटाउने एक्साभेटर प्रयोग गरिएको रसुवा प्रहरी प्रमुख तथा प्रहरी नायव उपरीक्षक शरतकुमार थापा क्षेत्रीले जानकारी दिए ।
काठमाडौँबाट एकसय ५२ किलोमिटर उत्तर भोटेकोशी नदी किनारमा रसुवागढी नाका रहेको छ । चीनले यस नाकालाई गत सेप्टेम्बरदेखि अन्तराष्ट्रिय नाकाको रुपमा मान्यता दिइसकेको छ ।
अन्तराष्ट्रिय व्यापारिक नाका रसुवागढी जोड्ने सडकखण्डमा पहिरो गएपछि यातायात रोकिएको छ । आइतबार दिउँसो १ बजेको समयमा स्याफ्रुबेंसीमा सुख्खा पहिरो गएपछि यातायात रोकिएका हुन् ।
मल्टी इनर्जी डेभलपमेन्ट प्रालिले निर्माण गरिरहेको २० मेगावट क्षमताको लाङटाङखोला जलविद्युत आयोजना निर्माणस्थलमा पहिरो गएको थापा क्षेत्रीले बताए । पहिरोले सडक भासिएर तल पुर्याएको छ ।
सडक अवरुद्ध भएपछि दुई सय भन्दा बढी साना ठूला गाडी बीच बाटोमै रोकिएका छन् । सडक सञ्चालनका लागि सडक मर्मत तथा निर्माणको कार्य भइरहेको रसुवा प्रहरीले जनाएको छ ।
प्रतिक्रिया दिनुहोस !
